Uko wahagera

Iperereza Kuri Trump

Abarimu bane mu by’amategeko baturuka muri za kaminuza zitandukanye batanze ubuhamya imbere ya Komite ishinzwe inzego z’ubutebera y’inteko ishinga amategeko-Umutwe w’Abadepite ya Leta zunze ubumwe z’Amerika.

Abo barimu Noah Feldman, Pamela Karlan, Michael Gerhardt, na Jonathan Turley ni bantu ki? Noah Feldman ni mwarimu muri kaminuza ya Havard. Yabaye umujyanama mu by’amategeko w’umucamanza David Souter wari mu Rukiko rw’Ikirenga rwa Leta zunze ubumwe z’Amerika kuva mu 1990 kugera mu 2009. David Souter yashyizwe mu Rukiko rw’Ikirenga na Perezida George H. W. Bush w’Umurepubulikani. Noah Feldman yabaye kandi umujyanama mu by’amategeko wa leta y’agateganyo ya Iraki yagiyeho nyuma y’igitero cy’ingabo za Leta zunze ubumwe z’Amerika. Porofeseri Noah Feldman avuga ko Abademokarate bo mu nteko ishinga amategeko bafite impamvu yo kurega Perezida Trump kuko “yakoresheje nabi ububasha bwe bw’umukuru w’igihugu.”

Pamela Karlan yigisha muri Kaminuza Stanford. Mu gihe Perezida Barack Obama yari ku butegetsi, Karlan yayoboye urwego rushinzwe kubahiriza uburenganzira bwo gutora rwo muri minisiteri y’ubutabera. Pamela Karlan yabaye kandi umujyanama mu by’amategeko w’umucamanza Harry Blackmun wari mu Rukiko rw’Ikirenga rwa Leta zunze ubumwe z’Amerika kuva mu 1970 kugera mu 1994. Harry Blackmun yashyizwe mu Rukiko rw’Ikirenga na Perezida Richard Nixon w’Umurepubulikani. Porofeseri Pamela Karlan ntajya avuga ku mugaragaro ibitekerezo bye ku maperereza akorwa kuri Perezida Trump.

Michael Gerhardt ni mwarimu muri Kaminuza ya leta ya North Carolina. Ari mu batanze ubuhamwa nk’impuguke mu rubanza rwa Perezida Bill Clinton (w’Umudemokarate) ubwo inteko ishinga amategeko yamuburanishaga mu 1998. Umutwe w’Abadepite wareze Perezida Clinton ibyaha byo kubangamira ubutabera, kubeshya abagenzacyaha hejuru y’indahiro, no gukoresha nabi umwanya w’umukuru w’igihugu. Sena yamugize umwere.

Porofeseri Michael Gerhardt yanditse igitabo cyitwa "Impeachment: What Everyone Needs to Know" ni nko kuvuga ngo “Kurega umukuru w’igihugu: Icyo buri wese akwiye kumenya.”

Impuguke ya kane muri ubu buhamya ni mwarimu Jonathan Turley wigisha muri Kaminuza George Washington. Nawe yatanze ubuhamya mu rubanza rwa Perezida Bill Clinton mu 1998. Avuga ko Abademokarate bihuse cyane mu mirimo yabo yo gukora amaperereza kuri Perezida Trump, cyane cyane ko hari “abatangabuhamya b’imena” batarabasha kumva.

Uyu munsi hano i Washington, Komite ishinzwe inzego z’ubutebera y’inteko ishinga amategeko-Umutwe w’Abadepite yatangiye kumva mu ruhame abatangabuhamya mu rwego rw’amaperereza kuri Perezida Donald Trump. Aba mbere ni abarimu bane b’amategeko ba kaminuza zitandukanye. Umwe yahamagajwe n’abadepite b’ishyaka ry’Abarepubulikani. Abandi batatu batumijwe n’Abademokarate.

Baragerageza gusobanurira rubanda n’intumwa zabo ingingo z’itegeko nshinga ziteganya ibyaha byatuma umukuru w’igihugu aregwa, uko ashinjwa, uko aburanishwa, n’impamvu zatuma akurwa ku butegetsi aramutse ahamwe n’ibyaha.

Komite yatumiye Perezida Trump w’Umurepubulikani n’abamwunganira mu by’amategeko nabo kuza kwibariza abatangabuhamya. Trump ahora avuga ko amaperereza amukorwaho abogamye, ko atamuha umwanya nawe wo kwiregura, kwihamagariza abatangabuhamya, no kwibariza ibibazo abahagamazwa n’Abademokarate.

Nyamara ku cyumweru gishize, umujyanama we mu by’amategeko muri White House yandikiye iyo komite ayibwira ko batazaza mu buhamya bwatangiye uyu munsi. Muri iyo baruwa arongera agashimangira ko amaperereza abogamye.

Komite ishinzwe inzego z’ubutabera y’Umutwe w’Abadepite itangiye kumva ku mugaragaro abatangabuhamya nyuma y’imirimo ya Komite ishinzwe inzego z’iperereza. Yayigejejeho imyanzuro yayo ejo kuwa gatatu. Yemeza ko nta gushidikanya Perezida Trump yakoresheje umwanya w’umukuru w’igihugu mu nyungu ze bwite za politiki. Komite ishinzwe inzego z’ubutabera ni yo izandika umushinga w’ibirego kuri Perezida Trump niramuka ibonye ibimenyetso bifatika.

Voma ibindi

XS
SM
MD
LG