Iperereza Kuri Trump

Muri Reta Zunze Ubumwe za Amerika, umurwi w’abashingamateka ujejwe iperereza, uyu musi ku wa kabiri uriko urumviriza abategetsi batari bake bakora muri perezidansi y’Amerika.

Abo bategetsi bari mu bumvirije ikiyago cabaye kuri telrfone hagati ya Prezida wa Amerika, Donald Trump hamwe na Prezida wa Ukraine Volodymyr Zelensky.

Jennifer Williams, akora mu biro kwa Visi Prezida Mike Pence nk’umufasha wiwe, hamwe na Lieutenant Colonel, Alexander Vindman, umutegetsi mukuru mu biro vy’akanama k’igihugu kajejwe umutekano banonosoye ibibazo vyerekeye igihugu ca Ukraine. Bompi ni bo bariko barashikiriza abashingamateka ivyo bazi ku birego vyagirizwa Prezida Trump.

Jennifer Willimas na Lieutenant Colonel Vindman batangaje ko batewe amakenga n’ico kiyago cabaye kuri terefone hagati y’abo bategetsi.

Ico kiyago ni co catumye Trump yagirizwa ko yariko arahimiriza abategetsi barongoye igihugu ca Ukraine, ngo batangure itohoza ku munyapolitike, Joe Biden, yahoze ari visi prezida wa Amerika, bashobora kuzohiganwa mu matora ategekaniwe mu mwaka w’2020.

Perezida wa Reta zunze ubumwe z’Amerika Donald Trump yari akeneye kumenya nimba Ukraine yotanguza itohoza kuri Joe Biden yahoze ari icegera ca perezida igihe yahagarika amafaranga agenewe gufasha igisirikare ca Ukraine.

Ivyo vyashikirijwe kuri uyu wa gatatu na William Taylor, ambasaderi w’Amerika muri Ukraine, igihe komisiyo ijejwe iperereza y’inama nshingamateka yariko irumviriza ibizwi n’abategetsi babiri bo ku rwego rwo hejuru mu bushikiranganji bw’imigenderanire n’amakungu.

Iyi komisiyo ni yo iriko iratohoza nimba Perezida Trump yararenze ku mategeko mu gusaba Prezida wa Ukraine, Volodymyr Zelenskiy, gutanguza iperereza kuri Joe Biden, ari mubahabwa amahirwe yo kuba umukandida w’umugambwe w’abademokrate mu matora y’umwaka uza.

Abo badiplomate babiri babwiye iyo komisiyo ko Trump yashizeho uyundi muhora wa kidipolomasiya utazwi wo gukurikirana ico kibazo ca Ukraine, urongowe n’umuavoka wiwe bwite, Rudy Giuliani, mu cizere c’uko Ukraine itangura amatohoza azoha inyugu za politike Trump.

Amategeko y’Amerika yerekeye ingene amafaranga akoreshwa mu myiyamamazo arabuza reta z’abanyamahanga gufasha mu matora y’Amerika. Ariko abashingamateka ni bo bazofata ingingo nimba ivyakozwe na Trump biri ku rugero rw’ivyaha ibwirizwa shingiro rivuga ko bikomeye vyotuma akurwa ku butegetsi.