Prezida w'Uburusiya, Vladimir Putin, ntaza kwitabira imihango yo gushingura Yevgeny Prigozhin yahoze atwara umurwi w'abarwanyi b'abacangero b'abarusiya, Wagner. Prigozhin yahoze ari incuti magara ya Putin, yaguye mu ndege yakorokeye mu Burusiya mu ndwi iheze.
Ibiro vya Prezida Vladimir Putin vyatangaje ano makuru, vyirinda gutomora umunsi Yevgeny Prigozhin azoshingurwako, n’ikibanza azoshingurwamwo.
Dmitry Peskov ajejwe gutanga amakuru mu biro kwa Putin, yavuze ko ubutegetsi bw’Uburusiya ataco bufise buvuga ku co yise “imihango iraba umuryango wa Prigozhin”.
Ibimenyeshamakuru bitandukanye vyo mu Burusiya bivuga yamara ko Prigozhin ashobora gushingurwa/aja yashinguwe kuri uno wa kabiri mw’itongo ry’abapfuye ryitwa Serafimovskoye. Iri tongo, rishingurwamwo abasirikare bafise amapete yo hejuru. Ni naho abavyeyi ba Prezida Vladimir Putin bashinguwe.
Itororokanirizo ry’amakuru y’abanyamerika, AP, dukesha ino nkuru ryasesanguye rivuga ko ibizigizigi n’ukutaboneka kw’amakuru yuzuye y’ishingurwa rya Prigozhin, biriko vyunyura amakenga y’abibaza ko indege yarimwo yoba yakorowe n’ibigiranka n’ubutegetsi bw’Uburusiya, kugira bumwihore, inyuma y’uko yabugumukanye.
AP ibandanya ivuga ko naho ubutegetsi bw’Uburisiya “budashaka ko Prigozhin yigeze guhabwa ubushimwe butari buke n’Uburusiya, ashingurwana ivyubahiro, bigoye kumwaka ikibanza n’uruhara yagize muri politike y’Uburusiya, biciye mu gutwara abarwanyi b’abacangero bo mu murwi wa Wagner”.
Amatohoza y’ibanze yakozwe n’ipererereza ry’Amerika yerekana ko indege y’abigenga yahitanye Prigozhin na zimwe mu ndongozi zindi za Wagner, yahenutse bitavuye kw’isanganya. Ubutegetsi bw’Uburusiya buhakana bwivuye inyuma ababwagiriza kuba inyuma y’ihenuka y’iyo ndege yahitanye abantu 10 bose bari bayirimwo.
Mu ndwi iheze, Prezida Putin agaruka ku vyaranze Prigozhin, yavuze ko yagize uruhara runini mu ntambara Uburusiya burimwo na Ukraine, yongera ashimangira ko yari umugwizatunga afise impano nyinshi, ariko kandi ko yari umugabo atamenyerwa, yakoze amakosa menshi mu buzima bwiwe. (AP)