Muri Leta zunze ubumwe z'Amerika, umushinjacyaha wihariye Jack Smith arasaba urukiko gutangira mu kwezi kwa mbere gutaha urubanza rwa Donald Trump ku byaha aregwa byo gushaka guhindura ibyavuye mu matora y'umukuru w'igihugu yo mu 2020.
Urubanza ruzabanzirizwa mu kwezi kwa 12 gutaha no gutoranya abaturage bazaba bagize urukiko rwa rubanda (Jury) ruzaruburanisha. Rwo nyakuri, mu mizi yarwo, rwatangira ku itariki ya 2 y’ukwa mbere 2024.
Mu nyandiko yashyikirije umucamanza, umushinjacyaha avuga ko bazarugaragazamo ibimenyetso byabo mu gihe kiri “hagati y’ibyumweru bine n’ibyumweru bitandatu.”
Umucamanza aramutse yemeye itariki ya 2 y’ukwa mbere gutaha byatuma Donald Trump amara iminsi y’imibyizi mu rukiko igihe cyose cy’urubanza. Bityo, ntiyabasha gukora politiki. Kandi amatora y’amajonjora yo mu ishyaka rye ry’Abarepubulikani azatangira ku itariki ya 15 y’ukwa mbere 2024.
We n’abavoka be bafite umugambi ko mu cyumweru gitaha bazasaba umucamanza indi tariki iri inyuma cyane y’iriya ya kabiri umushinjacyaha yifuza.
Umucamanza yabwiye impande zombi ko ashobora kuzabaha umwanzuro mu nama bazakorana bose hamwe ku itariki ya 28 y’uku kwezi.
Urundi rubanza Trump aregwamo ibyaha byo gutunga amabanga y’igihugu atabyemerewe n’amategeko, umushinjacyaha Smith yasabye umucamanza ko rwatangira kuburanishwa ku itariki ya 20 y’ukwa gatanu mu mwaka utaha. Trump n’abavoka be bo bifuza ko rwatangira nyuma y’amatora y’umukuru w’igihugu ataha. Azaba mu kwezi kwa 11, 2024.
Trump ahakana ibyaha byose aregwa muri izi manza zombi.
Uretse izi manza ebyiri zo ku rwego rw’igihugu, Donald Trump afite n’urundi rwo rwo ku rwego rwa Leta ya New York, yo mu burazirazuba bw’igihugu. Ruzantagira kuburanishwa ku itariki ya 25 y’ukwa gatatu 2024.
Aregwamo ibyaha bijyanye no kwica amategeko agenga amatora, bihereye ku mpongano yahaye umugore wakinaga amasenema y’abakuze, kugirango atazatangaza ko baryamanye kandi Trump afite umugore w’isezerano. Umushinjacyaha avuga ko Trump yanganga ko byamutesha amanota mu matora. Naho, Trump ahakana ibyaha aregwa.