Muri Leta zunze ubumwe z'Amerika, urukiko rw'ubujurire rwo ku rwego rw'igihugu rwicaye i Washington DC rwemereye umushinjacyaha wihariye, Jack Smith, gusaka konti ya Twitter y'uwahose ari umukuru w'igihugu Donald Trump.
Uru rubanza ruturuka mu kwezi kwa mbere gushize. Urukiko rw’ibanze rwo ku rwego rw’igihugu rwahaye Smith uruhushya rwo gusaka konti Twitter ya Trump. Rwakurikije ko Smith yari yarweretse ko ishobora kuba ibitse ibimenyetso ku byaha amukurikiranye kuri Trump byo gushaka kuburizamo ibyavuye mu matora y’umukuru w’igihugu yo mu 2020 kugirango yigumire ku butegetsi, no ku gitero abayoboke ba Trump bagabye ku itariki ya 6 y’ukwa mbere 2021 kuri Capitol, ingoro y’inteko ishinga amategeko y’igihugu.
Sosiyete Twitter yateye utwatsi ruriya ruhushya. Yaregeye urukiko ivuga ko ishaka kumenya niba rukurikije amategeko mbere yo kugira amakuru iha Smith. Twitter, ubu isigaye yitwa X, yaratsinzwe, irajurira.
Kuri uyu wa gatatu rero ni bwo urukiko rw’ubujurire rwatanze umwanzuro warwo, ruvuga ko Smith afite uburenganzira bwo gusaka konti ya Trump kandi ko igomba no kwishyura ihazabu y’amadolari 350,000.
Ubusanzwe, ibinyura kuri Twitter byose biba biri ku karubanda, buri wese ashobora kubibona. Kuki rero Smith ashaka iri saka? Ni uko hari ibyo igumana ntibisohoke nka Twitt umuntu yanditse ariko ntayitangaze, aho umuntu ushyize ubutumwa kuri Twitter aba ari, n’uburyo yakoresheje nka telefone ngendanwa cyangwa mudasobwa (computer).
Ku wa kane w’icyumweru gishize, Trump yitabye urukiko rwo ku rwego rw’igihugu hano mu murwa mukuru Washington D.C., umucamanza amusomera ivyaha Smith amurega, amategeko ajyana nabyo, n’ibihano ateganya. Byose hamwe byujuje igifungo cy’imyaka 55 biramutse bimuhamye. Trump yarahakanye ibyaha byose akurikinyweho, avuga ko nta na kimwe yemera.
Umushinjacyaha wihariye, Jack Smith, yifuza ko urubanza rwaba mbere y’umwaka w’2024, naho Donald Trump na ba avoka be bashaka ko ruburanishwa nyuma y’amatora y’umukuru w’igihugu ataha. Azaba mu kwezi kwa 11 kw’2024. Umucamanza yabwiye impande zombi ko ashobora gufata umwanzuro ku itariki ya 28 y’uku kwezi. (AP, Reuters)