Umunyamabanga mukuru wa ONU, Antonio Guterres, yatakambiye umuryango mpuzamahanga ngo wongere infashanyo y’ubutabazi y’ibihe bikomeye kuri Somaliya. Guterres yageze muri iki gihugu kuri uyu wa kabiri mu kwezi kw’igisibo cy’abayislamu, Ramazani, mu gihe hari amapfa akaze.
Mu ruzinduko rwe rwa kabiri muri Somaliya kuva mu mwaka wa 2017, Antonio Guterres, yavuze ko abaturage ba Somaliya bakwiye gushyigikirwa n’amahanga kugirango babashe guhangana n’amapfa no gukomeza kurwanya umutwe w’al-Shabab.
Uyu muyobozi yavuze ko mu mugambi w’ubutabazi wa 2023, habonetse gusa 15 kw’ijana by’amafaranga yasabwe. Avuga kandi ko Somaliya idakeneye gufashwa cyane gusa mu bibazo by’ubutabazi, ahubwo no mu bikorwa by’umutekano mu gihugu. Somaliya ihanganye na al-Shabab mu gihugu rwagati no mu bice by’amajyepfo.
Umunyamabanga mukuru wa ONU Guterres yagiye muri Somaliya bwa mbere mu kwezi kwa 3 muri 2017. Cyari igihe icyo gihugu cyari cyugarijwe n’andi mapfa, kandi ONU yaburiye ko ashobora kuvamo inzara. Ibyo biranaterwa n’uko imvura yabuze. Somaliya yiteze ko uruzinduko rwa Guterres ruzagaragaza uburemere bw’ikibazo, cyihutirwa, n’uko ibintu bihagaze. Bityo amahanga akaba yatanga igisubizo cyihuze. (VOA News)
ONU Isabira Imfashanyo Somaliya
Prezida wa Somaliya kumwe n'umunyamabanga mukuru wa ONU