Urukiko rusesa imanza rw'Ubufaransa rwemeje ko Kabuga Felicien agomba kuburanishwa n'Urwego rwa ONU rwasigariyeho TPIR (Urukiko mpanabyaha mpuzamahanga rwari rwarashyireweho u Rwanda).
Urukiko rusesa imanza rw'Ubufaransa ni rwo rwego rw'ubucamanza rwo hejuru, ni ukuvuga rwa nyuma, Kabuga yitabaje. Yaruregeye nyuma y'aho urukiko rw'ubujurire rw'i Paris narwo rwemereje mu kwezi kwa gatandatu gushize ko Kabuga Felisiyani agomba kujya kuburanira i Arusha muri Tanzania imbere y'Urwego rwasigariyeho TPIR imaze gufunga imiryango.
Urukiko rusesa imanza rw'Ubufaransa rwateye rero utwatsi icyifuzo cye ahubwo rukurikira urw'ubujurire, n'urw'ibanze, narwo rushimangira bidasubirwaho ko "nta ntambamyi n'imwe ihari, haba mu rwego rw'amategeko, haba mu rwego rw'ubuganga, yabuza ko Kabuga Felisiyani yohererezwa urukiko rwa ONU."
Kabuga arangije inzego zose z'ubujurire bwe. Hasigaye ko Leta y'Ubufaransa umwohereza mu gihe kitarenze ukwezi. Kabuga yatawe muri yombi ku italiki ya 16 y'ukwa gatanu gushize mu nkengero z'umujyi wa Paris, umurwa mukuru w'Ubufaransa, nyuma y'imyaka irenga 25 yari amaze ashakishwa. Akurikiranyweho bya jenoside yakorewe Abatutsi mu Rwanda mu 1994. We arabihakana.
Kabuga yasabaga kuburanishirizwa mu Bufaransa. We n'abavoka be bamwunganira bavugaga ko adashobora gukora urugendo rurerure kugera i Arusha kubera ubusaza (avuga ko afite imyaka 87 y'amavuko) n'indwara zikomeye afite: gisukali, umuvuduko munini w'amaraso, n'indi idakira igenda umubuza kugenda no kwinyagambura kandi ituma agenda arushaho kwibagirwa.
Facebook Forum