Urukiko rusesa imanza rw'Ubufaransa ruzatanga umwanzuro warwo kuri Kabuga Felisiyani ku italiki ya 30 y'uku kwezi kwa cyenda. Ruzamubwira niba agomba kujya kuburanira mu butabera mpuzamahanga cyangwa mu Bufaransa.
Kabuga Felisiyani yatawe muri yombi mu kwezi kwa gatanu gushize hafi y'i Paris mu Bufaransa. Ku italiki ya 3 y'ukwezi kwa gatandatu, urukiko rw'ubujurire rw'i Paris rwemeje ko agomba kohererezwa urwego rwasigariyeho urukiko mpanabyaha mpuzamahanga rwari rwarashyireweho u Rwanda TPIR.
Kabuga yajuririye urukiko rusesa imanza rw'Ubufaransa. Kuri uyu wa gatatu, abacamanza barwo bumvise ubushinjacyaha, busaba ko icyemezo kIjyana Kabuga i Arusha mu gihugu cya Tanzaniya kigumaho. Abunganira Kabuga, bo basaba ko aburanishirizwa mu Bufaransa.
Basobanuye ko Kabuga, umukambwe w'imyaka 87, arwaye cyane ku buryo atabasha gukora urugendo rurerure cyane rw'ibilometero ibihumbi birindwi kugera Arusha.
Kabuga naramuka atsinzwe mu rukiko rusesa imanza, leta y'Ubufaransa izaba ifite ukwezi kugira ngo imushyikirize MTPI (Mécanisme pour les Tribunaux pénaux internationaux).
Facebook Forum