Muri Leta zunze ubumwe z'Amerika, Steve Bannon, umwe mu nkoramutima cyane z'uwari umukuru w'igihugu, Donald Trump, yatawe muri yombi kubera gusuzugura inteko ishinga amategeko.
Intandaro yo gufungwa kwa Steve Bannon: komisiyo yihariye y'Umutwe w'Abadepite irimo ikora anketi ku gitero cy'abayoboke ba Trump cyo ku italiki ya 6 y'ukwa mbere gushize kuri Capitol, ingoro y'inteko ishinga amategeko y'Amerika, yahamagaje Bannon, w'imyaka 67 y'amavuko, ngo aze kuyisobanurira ibyo yaba azi kuri iki gitero. Yanze kuyitaba.
Mu kwezi gushize, inteko ishinga amategeko yashyikirije ikirego ku cyaha cyo kuyisuzugura kuri minisitiri w'ubutabera, Merrick Garland, ari nawe mushinjacyaha mukuru wa Leta zunze ubumwe z'Amerika. Ejobundi kuwa gatanu w'icyumweru gishize, umushinjacyaha yatanze ikirego mu rukiko.
Uyu munsi, Steve Bannon yigemuriye ubwe ubutabera, ahita ashyirwa muri kasho by'agateganyo. Agomba kugezwa imbere y’umucamanza bwa mbere nyuma ya saa sita (ku isaha ya Washington D.C.) mu rukiko rwo ku rwego rw'igihugu rwo mu murwa mukuru w'igihugu, kugirango amusomere ikirego, amubaze niba acyemera cyangwa niba atecyemera.
Itegeko rivuga ko icyaha cyo gusuzugura inteko ishinga amategeko gishobora guhanishwa igifungo kiri hagati y'ukwezi kumwe n'umwaka, ihazabu y'amadolari 1,000. Uretse kuba inshuti ya hafi cyane ya Trump, Bannon yanamubereye umujyanama wa mbere mu mezi arindwi ya mbere y'ubutegetsi bwe muri Maison Blanche, kuva ku 20 y'ukwa mbere kugera kuri 18 y'ukwa munani 2017.
Abaye uwa mbere Congress ikurikiranyeho icyaha cyo kuyisuzugura mu rwego rw'anketi zo ku gitero cyo mu kwa mbere ku ngoro yayo.