Muri Leta zunze ubumwe z'Amerika, abadepite batoye umwanzuro wo kurega Steve Bannon icyaha cyo gusuzugura inteko ishinga amategeko. Steve Bannon ni umwe mu nkoramutima za hafi z'uwahoze ari umukuru w'igihugu Donald Trump.
Uretse kuba inshuti ya hafi ya Trump, Bannon yanamubereye umujyanama wa mbere mu mezi arindwi ya mbere y'ubutegetsi bwe muri Maison Blanche, kuva ku 20 y'ukwa mbere kugera kuri 18 y'ukwa munani 2017.
Komisiyo yihariye y'Umutwe w'Abadepite irimo ikora anketi ku gitero cy'abayoboke ba Trump cyo ku italiki ya 6 y'ukwa mbere gushize kuri Capitol, ingoro y'inteko ishinga amategeko y'Amerika, yahamagaje Bannon ngo aze kuyisobanurira ibyo yaba azi kuri iki gitero. Yanze kwitaba, bituma Abadepite bemeje umwanzuro wo kumurega.
Inteko igomba gushyikiriza ikirego minisitiri w'ubutabera, Merrick Garland, ari nawe mushinjacyaha mukuru wa Leta zunze ubumwe z'Amerika. Ni we uzafata icyemezo cyo kujyana dosiye ya Steve Bannon mu nkiko ku cyaha cyo gusuzugura inteko ishinga amategeko.
Itegeko rivuga ko iki cyaha gishobora guhanishwa igifungo kiri hagati y'ukwezi kumwe n'umwaka, ihazabu y'amadolari 100,000. Abahanga mu by'amategeko bemeza ko minisitiri Garland aramutse afashe icyemezo cyo kujyana Bannon mu nkiko imanza zishobora gufata imyaka.
Mu mwaka ushize, Steve Bannon yasimbutse iburanisha. Umushinjacyaha yamureze icyaha cy'ubugambanyi. Perezida Trump yamuhaye imbabazi gato mbere y'uko ava ku butegetsi, urubanza rutaratangira kuburanishwa mu mizi yarwo.
Uretse Steve Bannon, Komisiyo yihariye y'Umutwe w'Abadepite ishaka kumva n'abandi bantu 18 bari begereye cyane Perezida Trump.
Facebook Forum