Umubare w’abantu bamaze guhitanwa na Serwakira yo mu nyanja yiswe Ana, wazamutse ugera kuri 12 muri Mozambike na Malawi. Byatangajwe n’abayobozi n’ubwo abategetsi n’imiryango itanga infashanyo bakirimo gusuzuma ibyangijwe byose n’iyo Serwakira yanyuze mu gice cy’amajyepfo y’Afurika kuwa mbere.
Ikigo cya Mozambike gishinzwe gucunga Ibiza no kugabanya ingaruka zabyo, ejo kuwa kabiri cyavuze ko abantu umunani bapfuye, 54 bakomeretse kandi ko 895 bahungishijwe amasaha 24 mbere ya Serwakira.
Abantu barenga 20.000 muri Mozambike bakozweho n’iyo Serwakira. Ibice by’amazu arenga 3.000 byarasenyutse. Naho arenga 600 ari ku butaka. Hari n’ibigo nderabuzima hamwe n’amashuri bibarirwa muri mirongo byasenyutse. Icyo kigo gishinzwe Ibiza cyongeyeho ko utudege tutagira umupilote n’amato byoherejwe mu bikorwa by’ubutabazi.
Muri Malawi bituranye, aho Serwakira yasize iciye umuriro w’amashanyarazi, ubwo imyuzure yangizaga ibikorwa remezo biwutanga, komiseri w’intara Chikwawa yemeje ko abandi bantu batatu bapfuye, nyuma y’uko ikigo gishinzwe Ibiza, kuwa kabiri gitangaje ko umuntu umwe yapfuye i Mulanje.
Naemi Heita, uyoboye intumwa z’imiryango mpuzamahanga y’ubutabazi, Croix Rouge na Croissant Blue, mu murwa mukuru wa Mozambike, Maputo, yabwiye ibiro ntaramakuru byo mu Bwongereza Reuters ko amazi meza yo kunywa, inzitiramibu ziteye umuti n’udupfukamunwa, ari bimwe mu bintu bikenewe byihutirwa, kugirango bakumire ibyorezo.
Reuters