Muri Myanmar, abasilikali barashe na none mu baturage bari mu myigaragambyo yo kwamagana kudeta yo ku italiki ya mbere y'ukwezi kwa kabiri. Abantu icumi byibura bapfuye.
Ibigo ntaramakuru mpuzamahanga bitandukanye n'ibinyamakuru byo muri Myanmar bivuga ko abantu batandatu baguye mu mujyi wa Myaing, mu ntara ya Magway yo hagati no hagati mu gihugu. Abandi bane biciwe umwe-umwe mu mijyi itandukanye ya Yangon, Mandalay, Bago na Taungoo.
Abarashwe uyu munsi biyongereye ku bandi byibura 60 bishwe mbere yabo. Imiryango iharanira uburenganzira bwa muntu, nka Amnesty International n'ishyirahamwe riharanira uburenganzira bw'imfungwa za politiki ryo muri Myanmar, ivuga ko abenshi bazira amasasu y'intambara. Abatawe muri yombi barenga ibihumbi bibiri.
Hagati aho, abasirikari bakoze kudeta barimo barashakira ibindi byaha umukuru w'igihugu bahiritse ku butegetsi Aung San Suu Kyi. Mu kiganiro yagiranye n'abanyamakuru uyu munsi, umuvugizi wabo, Brig. Gen. Zaw Min Tun, yavuze ko mu 2017/18 Suu Kyi yakiriye ruswa y'umwe mu banyapolitiki bakomeye muri Myanmar, igizwe n'amadolari ibihumbi 600, na zahabu ijya kugira agaciro kangana gutyo.
Kugeza ubu, Aung San Suu Kyi yaregwaga ibyaha bibiri byo kwica amategeko agenga ibihe by'ibiza n'agenga kohereza no gutumira ibicuruzwa mu mahanga.