Abanyalibani bashavuye bagiriza ifumbire ya “nitrate ya ammonium” yaturikiye mu bubiko kuri ruswa n'ugukora nabi kw'abanyapolitike.
Abari mu myiyerekano bashavuye batanye mu mitwe n’igipolisi ku muhingamo wo ku musi wa kane ku murwa mukuru, Beyrouth. Ni inyuma yuko ifumbire ya “nitrate ya ammonium” yari mu bubiko ituritse igahitana abantu barenga 130 mu ntango z’iyi ndwi.
Igipolisi kijejwe kurwanya imigumuko carashwiragije abari muri iyo myiyerekano bari bakoraniye ku rwinjiriro ry’inyubakwa y’inama nshingamateka mu gice co hagati ku murwa mukuru. Hari inyuma y’uko bamwe mu bari mu myiyerekano baturiye ibintu bongera batera amabuye inteko zijejwe umutekano.
Mu masaha ya kare yo ku musi wa kane, abanyagihugu baba ku murwa mukuru, Beyrouth barerekanye ishavu bafitiye reta mu gihe Prezida w’Ubufransa, Emmanuel Macron yariko agendera Libani.
Macron yabaye umutegetsi wa mbere wo mu mahanga agendeye Libani inyuma y’ivyabaye ku musi wa kabiri ku kivuko co ku murwa mukuru, Beyrouth.
Ikoraniro mpuzamakungu rigenewe gutororokanya amafranga agenewe Libani ritegekanijwe kuba ku musi w’Imana. Umuryango w’ibihugu vy’Ubulayi uzoba waserukiwe muri iyo nama.