Umukandida w’Abarepubulikani mu matora y'Amerika, Donald Trump, yaraye atangaje ko aramutse abaye perezida, yashyiraho imisoro irenze 200 ku ijana ku modoka zituruka muri Megizike zinjira muri Leta zunze ubumwe z’Amerika.
Yabivugiye mu kiganiro yahaye televiziyo Fox News ya hano muri Amerika. Yavuze ko yashyiraho imisoro y’amananiza ku buryo nta modoka n’imwe ikorewe hanze yagurishwa muri Amerika. Aravuga ko ibyo yabikora mu rwego rwo kurengera kompanyi z’Amerika zikora imodoka.
Si ubwa mbere Trump akangisha gushyiraho imisoro y’ikirenga ku modoka zikorerwa muri Megizike, kuko n'igihe yari umukandida perezida mu mwaka wa 2016 na nyuma yaho amaze gutorwa yasirisimbaga kuri iyo ngingo.
Mu mwaka wa 2019 abanyenganda zikora imodoka bavuze ko imisoro ingana na 25 ku ijana gusa ku modoka zituruka muri Megizike n’ibyuma byazo, bishobora kugira ingaruka zikomeye ku isoko ry’imodoka muri icyo gihugu.
Mu mwaka wa 2018, bitangiwe na Trump, Amerika, Kanada na Megizike byasubiye mu biganiro birebana n’amasezerano y’ubucuruzi hagati y’ibyo bihugu yo gukuraniraho imisoro ku bicuruzwa hagati yabyo