Imyigaragambyo imaze iminsi icumi idahagarara kubera urupfu rw’umwari Mahsa Amini, w’imyaka 22 y’amavuko, waguye mu maboko ya polisi. Uyu munsi, yakomereje na none mu mijyi irenga ijana, irimo ikomeye nk’umurwa mukuru Teherani, n’indi nka Tabriz, Karaj, Qom, Yazd, Sanandaj na Sardasht.
Leta ivuga ko abantu 41, barimo n’abo mu nzego z’umutekano, ari bo bamaze gupfira mu myigaragambyo kuva itangiye. Ariko imiryango iharanira uburenganzira bwa muntu yo yemeza ko abapfa ari benshi cyane kurushaho. Yemeza ko barenga 140 kugeza ubu, n’abandi barenga 5,000, barimo abari n’abategarugori amagana, bamaze gutabwa muri yombi.
Inkiko zashyizeho ingereko zihariye zo kuburanisha abo bose leta yita ko “bateza imvururu n’imyivumbagatanyo.”