Umunyamabanga mukuru wa ONU Antonio Guterres yasavye kubonana n’abaperezida b’Uburusiya na Ukraine, umwe umwe amusanze ku murwa mukuru w'igihugu ciwe.
Umuvugizi wa ONU, Stephane Dujarric yavuze ko Guterres yabisavye abicishije mu makete yarungikiye perezida Vladimir Poutine na perezida Volodymyr Zelensky.
Ishirahamwe mpuzamakungu ONU rikunze kunegurwa ko ataco ririko rirakora kugira iyi ntambara ihagarare kuva aho Uburusiya butanguriye gutera Ukraine kw’itariki ya 24 y’ukwa kabiri.
Iyi ntambara yaracanishijemwo ibihugu bifise ivyicaro ntayegayezwa mu kanama ka ONU kajejwe amahoro n’Umutekano arivyo Reta zunze ubumwe za Amerika, Ubufaransa, Ubwongereza, Ubushinwa hamwe n’Uburusiya.
Perezida Poutine ntaritaba terefone ya Guterres kuva aho uwo mukuru wa ONU avugiye ko Gutera Ukraine k’Uburusiya kwabaye guca kubiri n’amategeko agenga ONU.