Nyuma y'amasaha atatu gusa yegukanye Intsinzi yo kuba Perezida mushya wa Koreya y'Epfo, Yoon Seok-youl wahoze ari umushinjacyaha yibukijwe akazi katoroshye kamutegereje natangira imirimo ye mu kwezi kwa gatanu: imibanire y'igihugu cye na Koreya ya Ruguru.
Mu itangazo ryasohotse mu gitangazamakuru cya leta kuri uyu wa kane, Koreya ya Ruguru yaciye amarenga ko vuba aha izohereza mu kirere icyogajuru gikusanya amakuru akoreshwa n'inzego z'igisirikare. Iki gikorwa gishobora gutera umwuka mubi ku kigobe ibi bihugu byombi bibarizwaho.
Perezida Kim Jong Un wa Koreya ya Ruguru yavuze ko iki cyogajuru kizatanga amakuru akenewe kandi ku gihe, yerekeye icyo yise 'ubushotoranyi bw'ingabo za gashakabuhake Amerika'. Aya makuru yatangajwe n'ikigo cy'itangazamakuru rya Leta – (Korean Central News Agency).
Leta zunze ubumwe z'Amerika n'inshuti zayo bibona gahunda ya Koreya ya Ruguru yo kohereza icyogajuru mu kirere nk'uburyo buziguye bwo kugerageza ikoreshwa ry'ibisasu bya missile birasa kure byabujijwe n'inama ishinzwe amahoro ku isi y'Umuryango w'Abibumbye.
Ku wa gatatu, igisirikare cy'Amerika cyatangaje ko cyongereye ingufu mu by'ubutasi no gukurikiranira hafi Koreya ya Ruguru n'imyiteguro yayo yo kongera ingufu mu by'ikoreshwa ry'ibisasu bya kirimbuzi mu karere.