Mu itangazo yashyize ahagaragara, umuyobozi mukuru w'ishami ry'Umuryango w'Abibumbye ryita ku Buzima, OMS, Tedros Adhanom Ghebreyesus, avuga ko "Siyanse yaduhaye ibikoresho byo kurwanya icyorezo cya Covid." Ati: "Isi ibisaranganyije uko bikwiye, dushobora guhagarika umuvuduko wa Covid-19 muri uyu mwaka."
Muri urwo rwego, Ghebreyesus arasaba ibihugu bikize gutanga umusanzu wabyo bigomba mu mugambi witwa ACT-A, kugira ngo ufashe n'ibihugu bikennye gukingira abaturage babyo bose, kubapima no kubabonera imiti.
ACT-A yashinzwe n'ibigo mpuzamahanga by'ubuzima, Banki y'isi yose, na Fondation Bill and Melinda Gates. Iyobowe na OMS. Igamije kugeza byihuse ku bihugu bikennye ibikoresho byo kurwanya Covid-19. Imwe muri gahunda zayo ni Covax, igomba guha ku buntu inkingo za Covid ibihugu 92 bikennye. Hagati mu kwezi kwa mbere gushize, Covax yari imaze gutanga dose miliyari imwe.
Umugambi ACT-A ukeneye ingengo y'imari y'amadolari miliyari 23,4 ku gihe cy'umwaka, guhera mu kwa cumi 2021 kugera mu kwa cyenda 2022. Uracyabura rero amadolari miliyari 16. Perezida w'Afurika y'Epfo, Cyril Ramaphosa, na minisitiri w'intebe wa Norvège, Jonas Gahr Støre, bafatanyije kuyobora akanama gakuriye ACT-A, barayasaba ibihugu 55 bikize n'ibimaze kugera hagati mu bukire.
Mu ibaruwa babyandikiye, baragira, bati: "Ubusumbane mu nkingo za Covid, mu bikorwa byo kuyipima no ku miti ni bwo butuma icyorezo gitinda gucika. Turasaba abayobozi gutanga umusanzu wabo, kugira ngo tubashe kurengera ubuzima bwacu twese hamwe."
Kugeza ubu, ibihugu bitandatu byonyine ni byo byarangije kuzuza inshingano zazo ku ngengo y'imari ya ACT-A. Ni Canada, Ubudage, Kowete, Noruveje, Arabiya Sawudite na Suwede.
VOA/AFP