Sosiyete Nyarwanda y'indege Rwandair yatangaje ko igiye kugabanya imishahara y'abakozi bayo. Mu itangazo yageneye abakozi bayo Rwandair yasobanuye ko hagamijwe kugabanya amafaranga yakoreshaga kubera ko ikomeje guhura n'ingaruka z'icyorezo COVID-19.
Amakuru y’igabanywa ry’imishahara ku bakozi ba sosiyete nyarwanda y’indege Rwandair akubiye mu itangazo ryasohotse ku itariki ya 24 z’uku kwezi kwa kane. Riravuga ko Rwandair igiye kubagabanyiriza imishahara mu mugambi wo guhangana n'ingaruka iyi sosiyete y’indege yagizweho n'icyorezo cya virus ya Corona .
Mu ibaruwa y’amapaji abiri biboneka ko iyi sosiyeye yageneye abakozi bayo Ijwi ry’Amerika yafasheho Kopi umuyobozi mukuru wa RwandAir Mme Yvonne Makolo yabandikiye ko byabaye ngombwa ko Sosiyete y’indege akuriye ifata "ingamba zikomeye mu kugabanya amafaranga ikoresha".
Iyi baruwa ayanditse nyuma y’irindi tangazo ryo ku itariki ya 19 y'ukwezi gushize kwa gatatu uyu mwaka wa 2020 ryamenyeshaga ko RwandAir ibaye ihagaritse ingendo zose mu gihe cy'iminsi 30 . Yavugaga ko yashingiye ku mabwiriza ya minisiteri y’ubuzima mu Rwanda yo kurwanya no kwirinda ikwirakwizwa ry’icyorezo COVID-19. Rwandair yari yasigaje ubwikorezi bw’imizigo n’ubwo ibindi bikoresho byakenerwa muri ibi bihe isi yose ihanganye n’icyorezo cya Virusi ya Corona.
Mu ibaruwa ya Rwandair iravuga ko icyorezo COVID-19 cyatumye itakaza ahantu hose hayinjiriza amafaranga. Ni mu gihe isabwa gukomeza kwishyura ibisabwa bya ngombwa kugira ngo iyi sosiyete nyarwanda y’indege ikomeze imirimo yayo .
Ubuyobozi bwayo bukavuga ko bwafashe ingamba zirimo kudahemba abayobozi bakuru umushahara mbumbe w'uku kwezi kwa kane. Ubuyobozi bukavuga ko biri mu ntumbero yo gufasha Rwandair kugira ngo izabashe gukomeza gukora no mu minsi iri imbere .
Mu biboneka mu ibaruwa ya Rwandair inavuga ko yongereye igihe cy'ihagarikwa ry’amasezerano y’akazi ku bapilote ba Rwandair. Yongereye kandi igihe cy'ihagarikwa ry’amasezerano y’abakozi bayo yise ko “batari ab’ingenzi”. Ntitomora ngo bizamara igihe runaka ikavuga ko bizageza igihe izagira ikindi imenyesha abakozi bayo.
Sosiyete y’indege Rwandair yanahagaritse ibyo yageneraga bamwe mu bakozi mu rwego rwabafashaga mu kuborohereza akazi nko kubaha amakarita ya telephone n’ubundi buryo bw’itumanaho. Ibyo byasigaranye abakozi bake gusa.
Rwandair yasabye abakozi bayo gukoresha iki gihe yahagaritse ingendo bagafatamo Conge/ikiruhuko cy’umwaka bemererwa n’amategeko.
Uko bigaragara mu miterere yo kugabanya imishahara y’aba bakozi Sosiyete ya Rwandair ivuga ko mu kwirinda guhagarika amasezerano y’abakozi bayo bose guhera muri uku kwezi kwa kane 2020 byabaye ngombwa ko ifata n’inzindi ngamba zidasanzwe.
Muri izo ngamba harimo kugabanya umushahara mbumbe w'abakozi ku kigero kiri hagati ya 8% ku mukozi uhembwa umushahara wo hasi cyane na 65% ku mukozi uhembwa umushahara wo hejuru cyane.
Muri urwo rwego Rwandair yanatangaje ko imishahara y’abakozi bayo bakorera mu mahanga na yo izagabanyuka ikajya ku rwego rumwe n’urw’imishahara y’abakozi bakorera mu Rwanda.
Mu mpera z’umwaka ushize wa 2019 ni bwo Sosiyete y'indege ya Qatar Airways yagiranye amasezerano na RwandAir yo kwegukana 49% by'imigabane ya RwandAir. Kuva icyorezo COVID-19 cyatangira kumenyekana ku butaka bw’u Rwanda hagafatwa ingamba zidasanzwe zo guhagarika ingendo hafi ya zose ku butaka no mu kirere, hakunze kumvikana amasosiyete yatwaraga abagenzi mu modoka hirya no hino mu gihugu yagiye asubika amasezerano y’imikoranire y’abakozi bayo. Abakoresha bakavuga ko batayahagaritse bazisanga batakibona ayo kwishyura kuko imirimo bacungiragaho yahagaze.
Mbere y’icyorezo COVID-19 Rwandair yari imaze kwagura ingendo mu mpande zitandukanye z’isi cyane ku mugabane wa Afurika. Ku rundi ruhande mu bihe bitandukanye hakunze kumvikana andi makuru avuga ko Rwandair yaba yarakunze gukorera mu bihombo.
Ku busanzwe RwandAir ni ikigo cy'ubucuruzi cya leta, kandi kiza ku isonga mu bigo bya leta bitajya bihamagazwa mu nteko ishinga amategeko ngo gisobanure imikoresherezo y’imari yacyo. Ni mu gihe ubundi hari ibigo buri mwaka biba bigomba kugaragaza uko byakoresheje umutungo wabyo. Kimwe mu byinjirizaga iyi sosiyete y’indege ni abakerarugendo bayikoreshaga baza mu Rwanda kandi mu minsi yashize batakambiraga ubutegetsi bavuga ko urwego rw’ubukerarugendo rwarangije guhomba kubera COVID-19.