Polisi mu gihugu cya Tanzaniya yataye muri yombi umunyapolitike utavuga rumwe n’ubutegetsi Tundu Lissu. Uyu mugabo yari umwe mu bakandida biyamamarije umwanya w’umukuru w’igihugu mu matora yabaye mu cyumweru gishize. Yari ahagarariye ishyaka Chadema. Ifatwa rya bwana Lissu ryatangajwe na bamwe mu banyapolitike n’abo mu muryango we.
Lissu yari aherutse gutangaza ko atemera ibyavuye mu matora y’umukuru w’igihugu yatswinze na Perezida John Magufuli wo mu ishyaka CCM. Ifatwa rye ribaye umunsi umwe gusa, umuyobozi w’ishyaka rye Freeman Mbowe nawe atawe muri yombi ari kumwe n’abandi bayoboke b’ishyaka rya 40. Barashinjwa gushaka guhungabanya umutekano w’igihugu.
Amashyaka Chadema na ACT Wazalendo kuwa gatandatu yari yatangaje ko agiye guhamagarira abayoboke bayo kwigaragambya bamagana ibyavuye mu matora. Komisiyo y'amatora muri Tanzaniya yatangaje ko Perezida Magufuli yatsinze amatora ku majwi 84 ku ijana.
Facebook Forum