Muri Mali, leta iratangaza ko abasilikali bayo bishwe n'intagondwa hagati no hagati mu gihugu. Inyeshyamba zateye bwa mbere mu gicuku cy'ijoro ryakeye ikigo cya gisilikali cy'ahitwa Sokoura, mu ntara ya Mopti. Bishe abasilikali ba leta icyenda. Umubare w'abakomeretse wo nturamenyekana neza.
Igisilikali cyohereje abandi bo gutabara kare mu gitondo cy'uyu munsi. Intagondwa zabateze igico, bararasana. Abasilikali batatu ba leta bapfiriye muri iyi mirwano. Abandi icumi bakomeretse. Leta ya Mali ivuga ko hari abandi itaramenya umubare bazimiye, ariko ntivuga niba mu ntagondwa hari abapfuye. Irasobanura gusa ko ibi ari ibitero by'iterabwoba.
Umwe mu baturage babibonye yabwiye ikigo ntaramakuru Reuters cyo mu Bwongereza ko intagondwa zasize zitwitse ikigo cya Sokoura n'imodoka za gisilikali batabashije gutwara. Bajyanye izindi nyinshi.
Ibi bitero ni byo bikomeye bya mbere bya nyuma ya kudeta yo kuri 18 y'ukwa munani gushize yayobowe n'uwaje kuba visi-perezida w'inzibacyuho wa Mali, Colonel Assimi Goita. Yakoze kudeta yari asanzwe ari umugaba w'umutwe w'abasilikali udasanzwe uri ku isonga mu ntambara yo kurwanya intagondwa za kisilamu, zigizwe ahanini n'amashami ya al-Qaida n'umutwe wa Leta ya kisilamu.
Facebook Forum