Ingabo z’Amahoro za ONU muri Mali, MINUSMA, zavuze ko zibaye zihagaritse kugurutsa indege zose by’agateganyo, nyuma y’uko umuryango wa CEDEAO n’uw’Ubumwe bw’Ubulayi bishyizeho ibihano bifunga inzira z’ikirere n’iz’ubutaka.
Indege za MINUSMA zahagaritswe mu buryo butunguranye mw’ijoro ry’ejo ku cyumweru, mu cyo inyandiko ya imeyeri yoherereje abakozi bayo yavuze ko ari ihagarikwa ry’igihe gito.
Iyo imeyiri, Ijwi ry’Amerika yasuzumye, ivuga ko “MINUSMA yagaharitse izo ndege zose by’agateganyo” kandi ko abakozi bazamenyeshwa” vuba ubwo izi ngabo zizaba zimaze kwemererwa n’abayobozi muri Guverinema” gusubukura ingendo z’indege.
Sosiyete z’indege nyinshi zo mu karere zahagaritse serivise muri Mali, biturutse ku bihano byashyizweho n’umuryango w’ubukungu w’igihugu byo mu Burengerazuba bw’Afurika, CEDEAO. Ibi bihano byahagaritse ubwikorezi bwo mu kirere no ku butaka hagati y’ibihugu biri muri uwo muryango na Mali.
Ubufaransa bwashyikigiye ibihano bya CEDEAO, byashyizweho nyuma y’inama y’abakuru b’igihugu b'uyu muryango, i Accra, umurwa mukuru wa Ghana, kw’itariki ya 9 y’uku kwezi kwa mbere. Isosiyeti ya Air France nayo yahagaritse serivisi zayo kuri Mali.
Ubusanzwe, MINUSMA ikora ingendo imbere muri Mali hagati ya Bamako n’imijyi yo hagati mu gihugu n’iyo mu majyaruguru, ahari ibigo byinshi bya MINUSMA.
Mu nama y’inteko ishinzwe umutekano kw’isi ya ONU, yabaye tariki 11 y’uku kwezi kwa mbere, Uburusiya n’Ubushinwa byitambitse hagati, byanga ko ONU ishyigikira ibihano bya CEDEAO. Umuvugizi wa MINUSMA, ntiyahise aboneka ngo agire icyo abivugaho.
(VOA News, Bamako)
Facebook Forum