Perezida Donald Trump wa Leta zunze ubumwe z’Amerika kuri uyu wa mbere yavuze ko igihugu cye cyiteguye gufatira Turukiya ibihano bikaze kubera ibitero imaze iminsi igaba muri Siriya.
Icyakora yirinze kwemera ko yaba yarakoze amakosa yo gukura ingabo z’Amerika muri Siriya aho zafatanyaga n’iz’Abakurde mu guhashya umutwe w’iterabwoba wa leta ya kiyisilamu.
Ku rubuga rwe rwa twitter, perezida Trump yavuze ko icyo agamije; ari uguhagarika intambara z’urudaca Amerika imazemo igihe. Yanenze abatarashimye icyemezo cye; avuga ko ari bo bashoye Amerika muri izo ntambara.
Kuri iki cyumweru, Perezida Trump yavuze ko yatangiye ibiganiro n’abayobozi b’inteko ishinga amategeko bigamije gufatira Turukiya ibihano bikaze by’ubukungu.
Turukiya ivuga ko ibitero yagabye bigamije kugarura ituze hagati y’umupaka wayo na Siriya n’agace kayoborwa n’ingabo z’Abakurde Turukiya ishinja gukora iterabwoba.
Abayobozi b’Ubufaransa n’Ubudage banenze bikomeye ibitero bya Turukiya. Ishami ry’umuryango w’abibumbye ryita ku buzima OMS kuri uyu wa mbere ryatangaje ko abantu barenga 200,000 bamaze gukurwa mu byabo.
Facebook Forum