Umuvugizi w'inteko y'abajyanama ba Peresida Biden mu by'umutekano yatangarije abanyamakuru ko Uburusiya na Leta zunze ubumwe z'Amerika bazahura ku italiki ya 10 y'ukwa mbere.
Nyuma y'iminsi ibiri, ku italiki ya 12 y'ukwa mbere, iyi nama izakurikirwa n'indi, yo, hagati y'Uburusiya na OTAN (umuryango w'ubutabarane w'ibihugu bituriye amajyaruguru y'inyanja y'Atlantika).
Naho bukeye bwaho, ku italiki ya 13 y'ukwa mbere, indi nama ya gatatu izaba hagayi y'Uburusiya, Leta zunze ubumwe z'Amerika, n'ibihugu, birimo na Ukraine, bigize umuryango w'umutekano n'ubutwererane mu Bulayi (OSCE, Organisation pour la sécurité et la coopération en Europe, mu Gifaransa)
Izi nama zose zizibanda ku bibazo byo kugabanya intwaro za kirimbuzi n'urunturuntu rurimo rututumba hagati y'Uburusiya na Ukraine.
Ibihugu byo mu burengerazuba bw'isi bihangayikishijwe cyane n'ukuntu Uburusiya burimo bwohereza abasilikare benshi n'ibikoresho bikomeye by'intambara ku mipaka yabwo na Ukraine. Bikeka ko Uburusiya bwaba butegura gutera Ukraine.
Perezida w'Uburusiya, Vladimir Putin, arabihakana. Ahubwo nawe afite impungenge ko Ukraine, iri ku irembo rye, yakwinjira muri OTAN. Asaba uyu muryango kurahira ko utazabikora.
Facebook Forum