Mw’ijoro ryakeye muri Leta zunze ubumwe z’Amerika, urukiko rwo ku rwego rw’igihugu, rwicaye mu mujyi wa Seattle, muri leta ya Washington, mu burengerazuba bw’igihugu, rwahagaritse by’agateganyo iteka rya Perezida Donald Trump rikuraho uburenganzira bw’ubwenegihugu ku bana b’abimukira bavukiye muri Amerika.
Umucamanza wayoboye urubanza, John Coughenour, yaravuze, ati: “Maze imyaka irenga 40 muri aka kazi. Ariko ni ubwa mbere mbonye icyemezo kinyuranyije n’itegeko nshinga bene aka kageni.” Coughenour, w’imyaka 84 y’amavuko, yashyizwe mu nkiko zo ku rwego rw’igihugu na Perezida Ronald Reagan, na Sena iramwemeza, mu 1981.
Iki kirego cyaturutse kuri leta 22 muri 50 zigize igihugu, guverinoma y’umujyi wa District of Columbia, umurwa mukuru w’igihugu, n’iy’uwa San Francisco wo muri leta ya California (mu burengerazuba bw’igihugu), imiryango iharanira uburenganzira bwa muntu n’ubw’abimukira. Bavuga ko iteka rya Perezida Trump rinyuranyije n’itegeko nshinga.
Leta ya Washington nayo iri mu bareze. Minisitiri w’ubutabera wayo, Nick Brown, yishimiye icyemezo cy’umucamanza. Yagize ati:" Twaje mu rukiko uyu munsi kugirango turengere itegeko nshinga rya Leta zunze ubumwe, kugirango turengere demokarasi muri Amerika, no kugirango turengere icyo bivuze kuba umwenegihugu w’Umunyamerika. Twishimiye cyane ko urukiko rwabonye ko ari ikibazo gikomeye kandi kihutirwa. Biratunejeje cyane ko umucamanza yategegetse guverinoma ya Leta zunze ubumwe kuba ihagaritse icyo ari cyo cyose cyo gushyira mu bikorwa iteka rya Perezida.”
Minisiteri y’ubutabera yo ku rwego rw’igihugu yatangaje ko izajurira, kandi izaburana yivuye inyuma kuko iteka rya Perezida Trump “ritanyuranyije na gato n’ivugurura rya 14 ry’itegeko nshinga” riha abana bavukiye muri Amerika ubwenegihugu bwayo.
Forum