Visi Perezida w’Amerika Kamala Harris, uhagarariye ishyaka ry’Abademokarate mu matora y’umukuru w’igihugu ateganijwe kuwa kabiri, kuri iki cyumweru ariyamamaza mu mujyi wa East Lansing muri leta ya Michighan mu majyaruguru y’Amerika.
Donald Trump uhagarariye ishyaka ry’Abarepubulikani we ariyamamaza muri Pennsylivania, North Carolina na Georgia - leta eshatu z’isibaniro.
Mu masaha ya nyuma yo gushakisha amajwi, abakandida bombi bibanze muri izi leta zizwiho kuba zatora umukandida uwo ari we wese, bagerageza kuzigarurira.
Ikusanyabitekerezo rinyuranye kuri aya matora rirerekana ko umubare w’amajwi y’abakandida wegeranye cyane, bityo uzayatsinda akaba ashobora kuzarusha uwo bahiganwa amajwi make cyane.
Kugeza ubu abashinzwe kwamamaza abakandida bombi, bavuga ko hagati y’aba bakandida bombi, batakwemeza neza uzashobora gutsinda leta indwi z’isibaniro.
Umubare w’Abanyamerika batoye kare ugeze kuri miliyoni 75, bangana hafi na kimwe cya kabiri cya miliyoni 160 z’abantu batoye mu mwaka wa 2020, nkuko bigaragazwa n’ubushakashatsi bukorwa n’ikigo cya kaminuza ya Florida.
Birashoboka ko uzatsinda amatora atazahita amenyekana kubera ko zimwe muri za leta nka Pennsylvania zizabanza kubara amajwi yoherezwa mu iposita.
Forum