Kamala Harris uhagarariye ishyaka ry’Abademocrate mu matora ya Perezida w’Amerika ateganijwe taliki eshanu uku kwezi, na Donald Trump, umukandida w’ishyaka ry’Abarepubulikani bahanganye, kuri uyu wa gatandatu barerekeza muri leta ya North Carolina mu gihe hasigaye iminsi itagera kuri itatu gusa ngo umunsi nyirizina w’amatora ugere.
Iyi leta n’imwe mu zisibanirwa aho amajwi ashobora kwegukanwa n’umukandida uwo ari we wese. Uraba ari umunsi wa kane wikurikiranya Visi Perezida Kamala Harris na Donald Trump bahurira muri leta imwe kwiyamamaza.
Ibi biragaragaza uruhare rukomeye leta indwi z’isibaniro zifite mu kugena uzegukana umwanya wa perezida hagati y’aba bakandida bombi. Ikusanyabitekerezo rikorwa kuri aya matora kugeza ubu ryerekana ko abakandida bombi bafite umubare w’amajwi wegeranye cyane.
Abaturage barenga miliyoni 70 bamaze gutora nkuko bitanganzwa n’ubushakashatsi bukorwa muri kaminuza ya Florida kuri aya matora. Uyu mubare uri munsi y’uwabari bamaze gutora nk'iki gihe mu mwaka wa 2020, ariko na none urerekana ko abantu bashishikajwe no kwitabira aya matora.
Uyu wa gatandatu kandi ni wo munsi wa nyuma wagenwe w’abashaka gutora kare muri leta ya North Calorina, aho abagera kuri miliyoni 3.8 bamaze gutora muri iki gihe uburengerazuba bw’iyi leta bukizanzamuka nyuma ya serwakira Helene yibasiye iyi leta.
Forum