Muri Leta zunze ubumwe z’Amerika, kandida w’ishyaka ry’Abarepubulikani, Donald Trump, kuri uyu wa gatatu yakoze mitingi ya mbere hanze kuva arokotse umuntu wamurashe ashaka kumwica, aramuhusha, kw’itariki ya 13 y’ukwa karindwi gushize.
Mitingi yabereye ahitwa Asheboro, muri leta ya North Carolina, mu burasirazuba bw’igihugu. Yavugiye ijambo rye inyuma y’ibirahure bitamenwa n’amasasu. Igihe bamurasa ntabyari bihari.
Yikomye cyane bikomeye uwo bahanganye mu matora, kandida w’ishyaka ry’Abademokarate Kamala Harris, agira ati:" Kamarade Kamala naramuka atsinze mu kwa 11, intambara ya gatatu y’isi yose izatera. Ikintu cyose akozeho, aragisenya."
Kamarade ni ijambo bakoresha by’umwihariko ku bayoboke b’ishyaka rya gikomunisti. Trump yongeye ko Kamala Harris atowe, abantu amamiliyoni batakaza akazi bariho, n’amafaranga abantu bizigamiye azayoyoka.
Nyuma yo kurusimbuka mu kwa karindwi gushize, Trump yakoreraga minitingi ahantu hatari ku gasozi, nko mu nyubakwa nini cyane za siporo bita “arenas.”
North Carolina ni imwe muri leta zishobora kuzakiranura amatora: rimwe, abaturage bayo baha amajwi Abarepubulikani, ubundi bagatora Abademokarate. Muri uyu mwaka ntibagaragaza aho babogamiye.
Leta ya Wisconsin, mu burengerazuba bwo hagati bw’igihugu. Ni ho kandida w’ishyaka ry’Abademokate Kamala Harris yakoreye mitingi ku wa kabiri nijoro, mu mujyi wa Milwaukee, wakiriye Convention y’Abarepubulikani mu kwezi gushize kwa karindwi. Kuri we, aya matora ni amahitamo hagati y’intumbero ebyiri zihabanye.
“Ibi si ikibazo hagati yacu na Donald Trump. Ni indoro ebyiri zitandukanye kure cyane. Iyacu irangariye imbere hazaza, iyindi itumbereye inyuma hashize.” (AP, AFP)
Forum