Barack Obama wahoze ari perezida w’Amerika yashimagije Visi Perezida Kamala Harris avuga ko ari we mahitamo aboneye mu guhangana na Donald Trump mu matora y’umukuru w’igihugu yo mu kwa 11 k’uyu mwaka.
Ibyo bikubiye mu ijambo uyu wahoze ari umukuru w’Amerika yagejeje ku bademokarate kuri uyu wa kabiri mu nteko rusange irimo kubera mu mujyi avukamo wa Chicago.
Kuri Obama, ryari ikaze mu mujyi akomokamo ahabera inteko rusange y’ishyaka ry’abademokarate.
Aha imbaga y’abahakoraniye yamwakirije intero “Yego, yabikora” – bavuga Kamala Harris. Uyu wahoze ari Perezida nawe ati: “Amerika yiteguye igika gishya. Amerika yiteguye inkuru nziza. Twese twiteguye Perezida Kamala Harris.”
Obama yakoze igereranya ritaziguye hagati ya Kamala Harris na mukeba we w’umurepubulikani, Donald Trump wahoze ari Perezida.
“Kamala Harris ntazibanda ku bibazo bye bwite. Azibanda ku byanyu. Nka perezida, ntazita gusa ku bamushyigikiye hanyuma ngo ahane abanze gusoma impeta ye cyangwa kumwunamira. Azakorera buri munyamerika – uwo ni we Kamala.”
Nta Gihe Cyo Gupfusha Ubusa
Bwana Barack Obama yabimburiwe kuvuga n’umugore we, Michelle, wavuze ko igihe kigufi cyo kwiyamamaza cya Harris gikwiye gukangurira abademokarate gukora iyo bwabaga bakamutora.
“Ntitwahangayikishwa no kumenya niba iki gihugu kizatora umuntu nka Kamala, aho gukora uko dushoboye ngo umuntu nka Kamala atorwe.”
Nubwo abademokarate barangije inzira yabo yo kugena umukandida mu ntangiro z’uku kwezi, umuhango w’uguhamagarwa k’umukandida n’abaserukira za leta wagaragaje ishyaka abademokarate bafitiye uyu mukandida mushya.
Harris, utari mu ngoro y’inama rukokoma, yashimiye abaserukira za leta aho yari i Milwaukee ho muri leta ya Wisconsin mu bikorwa byo kwiyamamaza.
Abademokarate kandi bumvise ijambo rya Bwana Doug Emhoff, umugabo wa Kamala Harris. Uyu yise umugore we intwari inejeje.
“Azayoborera ku myizerere y’uko aho tuva hose, uko dusa kose, tuba dukomeye birenze iyo duharanira icyo twemera, kuruta gusa guhangara icyo dutinya.”
Uyu mugoroba wa kabiri w’inteko rusange kandi wanagaragayemo abahoze mu butegetsi bwa Trump n’abategetsi b’abarepubulikani bemeje Harris nk’umukandida bashyigikiye.
Undi Muntu wafashe ijambo muri iyi nama, mu buryo budasanzwe ni John Giles. Uyu si mudemokrate. Ahubwo ni umurepubulikani akaba meya w’umujyi wa Mesa, muri leta ya Arizona.
“Trump yijeje ibitangaza byinshi: izamuka ry’ubukungu ritagira imbibi, kuzahura inganda, umutekano ku mipaka. Bigaragara ko ibya Donald Trump byari amagambo masa.”
Uwo ni umwe mu barepubulikani bamagana ingamba za Donald Trump, baje muri iyi nama y’Abademokrate gukangurira abanyamerika iby’aya matora yimirije.
Kuri uyu wa gatatu, Guverineri wa Minnesota Tim Walz arageza ijambo ku barwanashyaka bakoraniye I Chicago, ari naho aza kwemerera ku mugaragaro guhagararira ishyaka ry’abademokarate nka kandida visi perezida.
Forum