I Chicago muri Leta ya Illinois muri Leta zunze ubumwe z'Amerika ku mugoroba wo kuri uyu wa mbere hatangiye inama rukokoma y'iminsi ine y'ishyaka ry'Abademokarate.
Iyi nama ni yo izemeza ku mugaragaro Visi Perezida w’Amerika Kamala Harris na Tim Walz ku mwanya kandida perezida na kandida visi perezida.
Ni nyuma y’uko Perezida Joe Biden mu kwezi gushize afashe icyemezo cyo kwikura mu irushanwa ryo guhatanira umwanya w'umukuru w'igihugu.
Harris azaba ahanganye kuri uwo mwanya na Donald Trump, umukandida w'ishyaka ry'Abarepubulikani, mu matora ateganijwe mu kwezi kwa 11.
Mu ijoro ryo kuri uyu wa mbere, Prezida Joe Biden ni we uri buvuge ijambo nyamukuru ry'umunsi aho ari bushyikirize ku mugaragaro ubuyobozi bw’ishyaka, Visi Perezida we Kamala Harris.
Ijambo rya Visi Perezida Kamala Harris ryemera kuba umukandida azarivuga mu ijoro ryo kuwa kane.
Nyuma y’aho abademokarate bahise bagaragaza ko bashyigikiye Harris kuba yahagararira ishyaka, nawe mu minsi ishize yahise atoranya Guverineri wa Leta ya Minnesota, Tim Walz, kumubera kandida visi perezida mu gihe yaba atsinze amatora ateganijwe mu mpera z’uyu mwaka.
Hagati aho, iyi nama rukokoma iraba mu gihe hafi yaho hakomeje imyigaragambyo ishyigikiye Abanyapalestina basaba ko intambara mu ntara ya Gaza ihita irangira.
Abashinzwe umutekano mu mujyi wa Chicago bavuga ko iyo myigaragambyo muri rusange irimo kuba mu mutuzo nubwo hari abantu bamwe bagerageje kurenga imbibi bashyiriweho bagatera amacupa abapolisi.
Mu ishyaka ry'Abarepubulikani abakandida baryo bo bakomereje ibikorwa byabo byo kwiyamamaza muri leta ya Pennyslyvania.
Kandida Trump yari mu mujyi wa York, aho yavugiye ijambo rivuga imigambi ye yo kuzahura ubukungu bw'igihugu.
Forum