Abasirikare barenga 200 b’Abarusiya n’aba Ukraine baratahanwe mu bihugu vyabo mw’ihererekanwa ry’imbohe. Umushikiranganji w’Uburusiya wo kwivuna abansi yavuze ko abasirikare 106 b’Abarusiya bavuye mu mabohero ya Ukraine.
Andriy Yermak, ajejwe abakozi mu biro vya perezida wa Ukraine Volodymyr Zelenskyy, yavuze ko Uburusiya nabwo bwarekuye imbohe 100 z’abasirikare ba Ukraine. Muri ayo matangazo y’ivyo bihugu bibiri ntihavuzwe nimba hari ikindi gihugu cabifashijemwo.
Yermak yavuze ko bamwe mu basirikare ba Ukraine bakomeretse cane abandi barwaye. Yongeyeko ko iri hanahana ry’imbohe z’intambara ryashitsweko bitoroshe ugereranije n’izahanahanywe mbere kuva mu kwezi kwa kabiri 2022. Ariko ntiyasobanuye ingene vyari bigoye.
Iri hanahana ry’imbohe zo mu ntambara ni kimwe muvyo Ukraine n’Uburusiya bahurizako. Izo mpande zibiri zimaze gusubizanya abasirikare baharurwa mu majana ku ruhande rumwe rumwe, harimwo n’abapfiriye ku rugamba kuva intambara itangura.
Haruhande y’ibi, ibiro vya prezida wa Ukraine vyavuze ko abantu batandatu bakomerekejwe n’ibitero bishasha vy’Uburusiya vyo kuri uyu wa mbere. (AP)
Facebook Forum