Paul Rusesabagina kuri uyu wa gatatu ni ho yashika muri Reta zunze ubumwe za Amerika, avuye muri Katari. Ni ho yabanje gushikira akirekurwa mu Rwanda. Iyi nkuru yatangajwe kuri uyu wa gatatu n’itororokanirizo ry'amakuru ry'Abanyamerika, Associated Press. Agiye kuzoca asubira kwiyunga n’umuryango wiwe, inyuma y’imyaka irenga ibiri yari amaze afunzwe, nkuko amakuru atangwa n’umuntu azi iyi dosiye abivuga.
Ugushika kwa Paul Rusesabagina muri Amerika vyari vyitezwe muri iyi ndwi. Uwuhagarariye ibikorwa vy’ubuhanuzi mu bijanye n’umutekano muri perezidanse ya Amerika, White House, John Kirby, yabwiye abamenyeshamakuru ku musi wa mbere ko Rusesabagina yari i Doha, muri Katari kandi ashobora guca arangurura agaruka muri Amerika.
Umuntu abikurikiranira hafi, atashimye ko amazina yiwe agaragara, yavuze ko indege yazanye Rusesabagina yashitse mu gisagara ca Houston, muri reta ya Texas ejo kuwa gatatu, inyuma ya saa sita. Yavuze ko aca atwarwa mu bitaro vya gisirikare vyo mu gisagara ca San Antonio, muri iyo reta ya Texas nyene gusuzumwa amagara yiwe.
Umukobwa wiwe nawe nyene yavyemeje yanditse ubutumwa ku rubuga Twitter, avuga ko se yidegemvya, ubu ari i San Antonio. Muri ubwo butumwa yavuze kandi ko ashimiye uwo wese yagize uruhara ngo umuvyeyi wiwe atahuke mu rugo. Ati: uyu musi umuryango wacu wongeye guhuzwa.
Mu mwaka wa 2021, Rusesabagina yaciriwe gufungwa imyaka 25 mu Rwanda inyuma yo kwegekwako ivyaha umunani birimwo kuba mu murwi w’iterabwoba, kwica, no kunyuruza.
Mu ndwi iheze, reta y’u Rwanda yaramubohoye inyuma y’ibiganiro vya kidiporomasiya bifashijwemwo n’igihugu ca Katari na Reta zunze ubumwe z’Amerika. Umushikiranganji ajejwe imigendernaire y’Amerika, Antony Blinken, we ubwiwe yabigezemwo uruhara. (AP)
Facebook Forum