Umusirikare wa Mbere w'Umurusiya Yaciriwe Urubanza mu Ntambara ya Ukraine

Vadim Shishimarin, umusirikare w'umurusiya w'imyaka 21, yasomewe uno musi ku wa mbere urubanza rw'ugupfungwa ubuzima bwiwe bwose ku caha camwagiye c'ukwica umusivile w'imyaka 62 muri Ukraine. Ni rwo rubanza rwa mbere ku vyaha vyo mu ngwano rubaye kuva Uburusiya buteye Ukraine mu kwezi kwa kabiri kw’uyu mwaka.

Imbere y’uko sentare imusomera urwo rubanza, yatangaje ko yakoze icaha gikomeye gihanwa n’amategeko mpuzamakungu akingira abasivile. Urwo rubanza rushobora kwunguruzwa mu kiringo c’imisi 30.

Umushikirizamanza mukuru muri Ukraine, Andriy Sunyuk, yatangaje ko bishobora gutuma haba izindi manza ku vyaha vyo mu ntambara vyakozwe n’abasirikare b’Uburusiya. Yizeye ko igihano Shishimarin yahawe gishobora gutanga ubutumwa ku bandi bakoze ivyaha nk’ivyo.

Amenyesha ko bishobora kubera akarorero ku bandi basirikare b’Uburusiya bashobora kuba batarashika ku butaka bwa Ukraine yamara babifitiye imigambi. Bishobora kubera akarorero kandi abasirikare b’Uburusiya bari ku butaka bw’ico gihugu bafise imigambi yo kuhaguma mu ntumbero yo kubandanya barwana.

Umuvugizi w’ibiro vya prezida w’Uburusiya, Dmitry Peskov, yatangaje ko abategetsi b’ico gihugu bafise impungenge ku vyerekeye Shishimarin. Amenyesha ko bazorondera uburyo bwose bomufashamwo. Imbere y'aho, yari yatangaje ko Uburusiya bubona ivyaha Shishimarin yagirijwe ko ari ibihimbano.
Ku musi wa gatanu Shishimarin yaremeye ko yishe umusivile w’imyaka 62. Amenyesha ko atashaka kwica ko yamara vyabaye.