Muri Burkina Faso abasirikare 16 ba leta n'inyeshyamba 4 baguye mu gitero izo nyeshyamba zagabye ku kigo cy'ingabo za leta mu karere ka Burkina Faso kashegeshwe n'umutekano muke.
Ibyo biratangazwa n'ingabo za leta zemeza ko abandi bagera kuri 21 bakomerekeye muri iyo mirwano yabereye mu ntara ya Sanmatenga ahari ikigo cya gisirikare cyitwa Namissiguima.
Itangazo ryashyizwe ahagaragara n'ingabo za leta ryavuze ko iyo mibare ari iy'agateganyo kandi ko bahise bohereza ingabo zo kunganira izari zihasanzwe. Gusa nta byinshi ryavuze ku bagabye icyo gitero.
Iki gihugu cyo mu burengerazuba bw'Afurika gihanganye n'ibibazo by'umutekano muke uterwa n'abarwanyi b'Abajihadiste. Mu myaka ishize, bagumye kwiyongera no gukwirakwira muri aka gace bavuye muri Mali ahari imitwe ifitanye isano na al Qaeda, na leta ya Kisilamu.
Ababarirwa mu bihumbi bamaze kugwa mu ntambara zinyuranye bateza mu gihe abarenga miliyoni ebyiri bavuye mu ngo zabo bahunga ikibazo cy'umutekano muke.
Facebook Forum