Umushinga w'umwanzuro wateguwe na Leta zunze ubumwe z'Amerika. Ibihugu 93 byawuhaye "YEGO", 24 byatoye "OYA", naho 58 byifashe. Bityo Inama rusange iba ihagaritse Uburusiya mu nteko y'Umuryango w'Abibumbye y'uburenganzira bwa muntu, ifite icyicaro i Geneve mu Busuwisi.
Mu batoye "OYA" harimo Uburusiya nyine ubwabwo, Belarusiya, Ubushinwa, Irani, na Siriya.
Ni ubwa kabiri bibaye mu mateka y'iyi nteko igizwe n'ibihugu 47, yashinzwe mu 2006. Ubwa mbere ni Libiya yahagaritswe muri iyi nteko mu 2011, kubera ubwicanyi uwari umukuru w'igihugu, Moammar Gadhafi, yarimo akora ku baturage, mbere y'uko ahirikwa ku butegetsi no kwicwa.
Ku itariki ya 24 y'ukwezi gushize, nabwo Inama rusange y'Umuryango w'Abibumbye yari yemeje, n'amajwi 140 kuri atanu gusa, undi mwanzuro wo kwamagana Uburusiya n'intambara bwagabye kuri Ukraine.
Facebook Forum