Virusi ya Corona, COVID-19 imaze kugera mu bihugu 105. Abayanduye bose barenga ibihumbi 115. Naho abo imaze guhitana kugeza ubu ku isi bararenga ibihumbi bine.
Intara y’Ubushinwa ya Hubei, aho COVID-19 yabanje, yadohoye gato ibyo gukumira urujya n’uruza rw’abantu. Perezida Xi Jinping w’Ubushinwa uyu munsi yagiye gusura umujyi wa Wuhan, umurwa mukuru wa Hubei. Yavuze ko bamaze gutera intambwe ikomeye mu rwego rwo guhashya COVID-19.
Mu Butaliyani, guverinoma yategetse, ku buryo butarabaho ku isi, ko abaturage bose uko ari miliyoni 60 baguma mu ngo zabo guhera kuri uyu wa kabili. Ubutaliyani ni cyo gihugu cya kabiri cyashegeshwe ku isi nyuma y’Ubushinwa.
Vatikani yafunze urubuga rwitiriwe Mutagatifu Petero kugera ku itariki ya 3 y’ukwa kane. Imbaga y’abantu bahateranira buri wa gatatu kugirango babonane n’umushumba wa kiriziya gaturika, Papa Fransisko, ntibazongera kuhajya igihe cyose ruzaba rufunze. Vatikani kandi yafashe icyemezo ko nta mukerarugendo izakira kugera ku itariki ya 3 y’ukwa kane.
Muri Leta zunze ubumwe z’Amerika, abadepite bane n’umusenateri umwe bafashe icyemezo cyo kwiha akato ubwabo kubera impungenge ko bashobora kuba barahuye n’abanduye COVID-19. Mu Bufaransa, mu bayanduye harimo abadepite batanu na minisitiri w’umuco.
Ku mugabane w’Afrika, kugeza ubu abantu bagera kuri 40 ni bo bamaze kwandura virusi ya Corona.