Minisiteri y'ububanyi n'amahanga y'Ubusuwisi yatangaje ko umwe mu bakozi bayo i Tehrani yapfuye azize impanuka. Ariko ntiyatangaje uwo ari we, n'ubwoko bw'iyo mpanuka.
Amakuru nyayo yatangajwe n'ibigo ntaramakuru byo muri Irani, Fars na ISNA, byombi byegereye leta. Bivuga ko uwapfuye ari umunyamabanga wa mbere (Premier Secrétaire) w'ambasade y'Ubusuwisi i Tehrani. Ni we wari wungirije ambasaderi. Ni umutegarugoli w'imyaka 52 y'amavuko.
Fars na ISNA bivuga ko yahubutse hejuru ku nzu ya 20 y'igorofa yari atuyemo, yitura hasi mu busitani. Umukozi wo muri ubwo busitani ni we wabonye umurambo we aje ku kazi, ahita ahamagara abatabazi. Ariko basanze yapfuye. Polisi ya Irani yatangaje ko yatangiye gukora anketi, kugirango bamenye icyamuhanuye.
Ambasade y'Ubusuwisi i Tehrani ni yo ihagarariye inyungu za Leta zunze ubumwe z'Amerika muri Irani, kuva ibihugu byombi bimaze guca umubano mu 1979 nyuma ya revolisiyo ya Kislamu.