Inzibacyuho ya Mali igomba kwihuta, igikorwa cya gisilikare cy’Ubufaransa kizakomeza. Ibi byavuzwe na minisitiri w’ububanyi n’amahanga w’Ubufaransa.
Minisitiri w’ububanyi n’amahanga w’Ubufaransa, Jean-Yves Le Drian, yabivuze uyu munsi kuwa kane, yongeraho ko kudeta muri Mali, idashobora guhagarika ibikorwa bya gisilikare by’Ubufaransa ku mitwe y’abarwanyi ba kiyisilamu.
Abasilikare bayoboye kudeta yahiritse perezida Ibrahim Boubacar Keita, kw’italiki ya 18 y’uku kwezi kwa 8, bari babwiye abahuza boherejwe n’ibihugu byo mu burengerazuba bw’Afurika, ko bashaka kuguma ku butegetsi mu nzibacyuho y’imyaka itatu nk’uko Nijeriya yaraye ibivuze.
Cyakora Minisitiri Jean-Yves Le Drian yabwiye radiyo RTL ati: “Inzibacyuho igomba gukorwa vuba na bwangu, ubutegetsi bugasubizwa abasivili kandi hari gahunda ya politiki yateganyijwe, kugirango iki gihugu kibashe gutekana mu bya politiki”.
Yavuze ko ibikorwa by’abahuza bo mu burengerazuba bw’Afurika, byagombaga kwanzurwa vuba, kugira ngo ibintu bise n’ibisubira mu buryo, kuko byari ngombwa gukomeza guhangana n’abarwanyi ba kiyisilamu.
Igihugu cy’Ubufaransa cyakolonije Mali, gifite abasilikare babarirwa mu 5 100 mu karere ka Sahel. Abenshi bakorera muri Mali, aho mu 2013 batangiye kugira uruhare mu gukumira imitwe y’abarwanyi ba kiyisilamu yari ikataje yerekeza mu murwa mukuru Bamako.