Ubufaransa bwabujije ibitaro gukoresha chloroquine nk'umuti uvura virusi ya Corona. Guverinoma y'Ubufaransa yatangaje icyemezo cyayo mu igazeti ya leta no mu itangazo rya minisiteri yayo y'ubuzima.
Ni icemezo gisheshe guhera uyu munsi iteka rya guverinoma ryari risanzweho kuva mu kwezi kwa gatatu gushize, ryemereraga abaganga bakora mu bitaro gusa kuvurisha chloroquine abarwayi barembye ya virusi ya Corona.
Guverinoma y'Ubufaransa isobanura ko yafashe iki cyemezo kubera impamvu z'umutekano w'ubuzima bw'abarwayi. Ubufaransa ni cyo gihugu cya mbere gihagaritse chloroquine mu kuvura virusi ya Corona nyuma y'aho OMS, ishami ry'Umuryango w'Abibumbye ryita ku buzima, ivugiye ejobundi kuwa mbere hashize ko ihagaritse igeragezwa rya chloroquine ku barwayi ba Covid-19.
Nabwo ni nyuma y'aho ikinyamakuru cyo mu Bwongereza cyazobereye mu by'ubuvuzi cyitwa "The Lancet" cyatangaje ko ubushakashatsi bwimbitse bwerekanye ko chloroquine yongera umubare w'abapfa iyo bayinywa barwaye Covid-19 kandi ko ibongerera n'ibibazo by'umutima.
Perezida wa Leta zunze ubumwe z'Amerika, Donald Trump, we by'umwihariko ari mu bategetsi bo ku isi bemeza ko chloroquine ivura virusi ya Corona, icyorezo kimaze guhitana abantu barenga ibihumbi 350 ku isi, barimo abagera ku bihumbi ijana muri Leta zunze ubumwe z'Amerika honyine gusa.