Mu ibaruwa yashyizeho umukono ejo kuwa gatatu, minisitiri w'ubutabera w'u Rwanda, Johnston Busingye, aramenyesha Depite Carolyn Maloney ko ubutabera bw'u Rwanda bwigenga. Ati: "Nk'uko urwego rw'igihugu rushinzwe ubushinjacyaha, NPPA mu magambo magufi y'Icyongereza, rubigaragaza, ifatwa n'iburanishwa bya Rusesabagina bishingiye ku bimenyetso bifatika nawe ubwe atarigera ahakana kugeza ubu, kandi bizwi na bose."
Minisitiri Busingye arakomeza, ati: "Urwego rw'igihugu rushinzwe ubugenzancya (RIB) n'ubushinjacyaha NPPA basobanuye neza mu nkiko no mu itangazamakuru ko Paul Rusesabagina atashimuswe kandi ko atahererekanyijwe hagati y'ikindi gihugu n'u Rwanda. Yavuye i Dubai ku bushake bwe mu ndege yihariye. Indege igeze mu Rwanda, yayururutse ku bushake bwe. Ni bwo yafashwe bikurikije impapuro zo kumuta muri yombi ubushinjacyaha bw'u Rwanda bwasohoye mu 2018."
"Ubushinjacyaha burega Paul Rusesabagina hamwe n'abandi bantu 18 ibyaha bikomeye birenga icyenda, birimo kurema umutwe ufite intwaro utemewe n'amategeko, kuba mu mutwe w'iterabwoba, gushyira imali mu iterabwoba; ubuhotozi, gushimuta abantu, gusahura, gutwika, kugerageza guhotora, kugaba ibitero, gutukana no gusebanya, byose bikoreshejwe nk'intwaro y'iterabwoba. Urukiko rwatangaje ko urubanza rwabo ruzatangira ku italiki ya 26 y'ukwezi kwa mbere 2021. Bazaburanishwa n'urugereko rw’urukiko rukuru rw'u Rwanda ruburanisha ibyaha mpuzamahanga n'ibyambukiranya imipaka ruri mu karere ka Nyanza, intara y'amajyepfo"
"Ikindi kandi, ubushinjacyaha NPPA bugaragaza ko Bwana Rusesabagina atigeze abigira ibanga cyangwa se ngo abiceceke ko afite imigambi y'ubwicanyi. Urugero: mu kwezi kwa 12 mu mwaka w'2018, nka Perezida wa MRCD-Ubumwe, n'ishami ryayo rya gisilikali FLN/NLF (Forces de Libération Nationale/National Liberation Forces) yatanze ubutumwa bw'umwaka mushya kuri Youtube avuga ko ashyigikiye urubyiruko rwa FLN kandi ahamagarira ku mugaragaro intambara ku Rwanda. Yaravuze, ati: "Igihe kirageze kugirango dukoreshe uburyo bushobotse bwose kugirango tuzane impinduka." Ubushinjacyaha NPPA bugaragaza ko nyuma y'iri jambo, umutwe MRCD/FLN wagabye kandi wigamba ibitero by'iterabwoba muri Nyamagabe, Nyaruguru, n'ishyamba rya Nyungwe, mu majyepfo y'u Rwanda, mu 2018. Byahitanye abantu icyenda, bikomeretsa n'abandi benshi.
"Uyu mutwe kandi waratwitse, uyogoza imitungo y'abaturage, n'ibikorwaremezo, birimo inyubakwa ya koperative, amamodoka, amapikipiki, n'ibindi.
"Tubibutse ko ubushinjacyaha NPPA bwashakishaga Rusesabagina ku mpapuro mpuzamahanga zo kumuta muri yombi kuva mu 2010, biturutse ku bimenyetso ko yatangaga imali muri FDLR, yari yaremejwe ku rwego rw'isi nk'umutwe w'iterabwoba, ufite umugambi umwe rukumbi wo gushyira iterabwoba mu Rwanda no kuruhungabanya. Uyu mutwe ukorera mu gice cyo mu burasirazuba bwa Repubulika ya Demokarasi ya Congo.
"Ku birebana n'impungenge mufite ku buzima n'uburwayi bwe, n'imiburanishirize ye, ndabasabye rwose mumenye ko Paul Rusesabagina ameze neza, abonana n'abaganga b'umwuga kenshi. Kandi n'umuryango we, bavugana kenshi, barabizi.
"Kubera ko afite ubwenegihugu bubiri bw'u Rwanda n'Ububiligi, akaba kandi afite uruhushya rwo gutura muri Leta zunze ubumwe z'Amerika, abadipolomate b'Ababiligi n'Abanyamerika bamusura kenshi buri gihe cyose babisabiye. Namwe mwagombye kubyigenzurira ko ari byo.
"Paul Rusesabagina yunganiwe n'abanyamategeko yihitiyemo. Kimwe n'undi Munyarwanda uwo ari we wese, uburenganzira bwe ku rubanza rudafifitse, runyuze mu mucyo, buteganyijwe kandi burengerwa n'itegeko nshinga."