Nyuma y’uko Polisi y’u Rwanda ikomeje guta muri yombi abantu banduye Covid-19 ariko bakanga kwishyira mu kato nk’uko amabwiriza y’abaganga abiteganya, yongeye kuburira abo bantu bose ko ibihano bibategereje.
Kuri uyu wa gatandatu, uru rwego rwafashe umuntu wabonwemo Covid-19 ari muri Resitora asangira n’undi. Umuvugizi wa Polisi y’u Rwanda, Jean Bosco Kabera, yabwiye Radiyo Ijwi ry’Amerika, ko uwafashwe yaje asanga umushoferi nawe watawe muri yombi na Polisi, azira ko yabwiwe ko yanduye Covid-19 agakomeza gutwara abagenzi.
Polisi y’u Rwanda iburira abantu bose banduye Covid-19, bakanga kwishyira mu kato, bagakomeza imirimo ibahuza n’abandi, ko uwo bizagaragara ko yanduje abandi azahanishwa ibihano bikomeye birimo no gufungwa imyaka igera kuri 3.
Igihano cyo gufunga uwanduje undi yari yarabwiwe ko yanduye Covid-19 akanga kwishyira mu kato, kije kiyongera ibindi byari byarashyizweho n’umugi wa Kigali umwaka ushize, harimo ko umuntu ufashwe atambaye agapfukamunwa acibwa amande y’ibihumbi 10, amande y’ibihumbi 25 kuwishyuye ibicuruzwa adakoresheje ikoranabuhanga, amande ya 10,000 Frw ku batambaye cyangwa bambaye nabi agapfukamunwa, amande ya 200,000 Frw ku gutegura ibirori n'ibindi bihuza abantu mu buryo butemewe, uwabyitabiriye agacibwa amande ya 25,000Frw ndetse na amande ya 50,000 Frw ku kuva no kujya ahantu habuzanyijwe mu kwirinda ikwirakwizwa ry'iki cyorezo.
Ingamba zikomeje gukazwa, mu gihe imibare y’abanduye Covid-19 ikomeje gutumbagira. Ku munsi w’ejo abantu banduye Covid-19 bari 868, bituma umubare w’abarwayi ba Covid-19 ugera 35.886, harimo 26.977 bamaze gukira iyi ndwara, abakirwaye barangana na 8498, abo imaze guhitana barabarirwa 411.
Umviriza ibindi muri ino nkuru ya Assumpta Kaboyi akorera Ijwi ry'Amerika i Kigali aho hasi
Your browser doesn’t support HTML5
Rwanda: Uwutazokwishira mu Kato Kandi Yaranduye Azohanwa Gute?