Abasirikare 3 badasanzwe ba Somaliya bishwe, umusirikare w'umunyamerika arakomereka bikomeye mu gitero ca bombe yari yatezwe mu modoka. Ico gitero cabereye hanze y’ikambi y’igisirikare mu bumanuko bw’igihugu uno musi ku wa mbere.
Mohamed Ahmed Sabriye, umuyobozi ajejwe gutangaza amakuru mu ntara ya Jubbaland avuga ko uwundi musirikare ari mu bari bakomeretse yitavye Imana inyuma yaho.
Umurwi al-Shabab umenyesha ko ari wo uri inyuma y’ico gitero. Utangaza ko abasirikare ba Reta bishwe bagera kuri 20. Uvuga ko wakoze igitero ca bombe yari yatezwe mu modoka kw’ikambi irimwo abasirikare ba Reta n’inteko za Amerika mu ntara ya Jubbaland.
Utangaza ko wishe abasirikare 4 b’abanyamerika n’abasirikare 16 ba Reta ya Somaliya. Umurwi al-Shabab uvuga kandi ko wakomerekeje abandi basirikare ba Reta 12, usambura n’ibimodoka vya blinde 3 vy’inteko za Amerika.
Reta ya Somaliya n’umurwi al-Shabab kenshi bitanga ibiharuro bitandukanye ku bakomeretse n’abapfuye ku mpande zompi.