Urukingo Siriya yakiriye ni urwitwa Sputnik V rwa COVID-19 nk’uko ibiro ntaramakuru Interfax by’Uburusiya byabitangaje uyu munsi kuwa kane bisubiramo ibyavuzwe n’Ambasaderi wa Siriya mu Burusiya.
Ambasaderi Riad Haddad ntiyavuze uko uwo muzigo w’inkingo ungana. Cyakora yavuze ko ubu zigiye guhabwa rubanda nyuma y’uko abaganga n’abayobozi bakuru mu gihugu babaye aba mbere mu kubona urukingo rwa mbere.
Ku ruhande rwe, Mikhail Bogdanov wungirije minisitiri w’ububanyi n’amahanga w’Uburusiya, yavuze ko izindi nkingo zishobora kuzoherezwa.
Byumvikanye mu magambo ya Bogdanov, Interfax yasubiyemo agira ati: “Nizisabwa kandi nibiba bishoboka, hazaba hari izindi nkingo, tuzafasha incuti zacu zose”.
Uburusiya bwashyigikiye Perezida Bashar al-Assad kandi bwamufashije kwihagararaho mu ntambara y’abaturage muri Siriya.