Sentare ntahinyuzwa muri Nijeriya yanse ibirego vy’umugambwe utavuga rumwe n’ubutegetsi, Parti populaire démocratique (PDP), wari witwaye uvuga ko utemera ko Perezida Muhammadu Buhari yatahukanye intsinzi mu matora yo mu kwezi kwa kabiri.
Umukuru wa sentare ntahinyuzwa, Tanko Muhammad, yasiguye ko inyuma y’indwi zirenga zibiri bari bamaze bariko biga dosiye y’ibirego vy’umugambwe PDP basanze bidafashe.
Tanko Muhammad yavuze ko vuba bazotanga insiguro ziramvuye z’icatumye banka ivyo ibirego.
Perezida Muhammadu Buhari mu matora yo mu kwezi kwa kabiri yegukanye intsinzi afise amajwi 56%, uwo bahiganwa na we Atiku Abubakar aronka 41%.
Atiku Abubakar yakomeje kuvuga ko amatora yabayemwo ubusuma yongera yibonekezamwo utunenge. Ibirego vy’abatavuga rumwe na Reta vyatanzwe mu gihe abagize Reta binjiye mu mabanga yabo mu kwezi kwa munani.
Indorerezi zo ku rwego rw’igihugu na mvamakungu zirimwo izo mu muryango w’ubumwe bwa Bulaya amatora akiba na zo zavuze ko hari utunenge tutari duke twayibonekejemwo harimwo iterabwoba ryakorerwa abatoye. Abantu 53 barasize ubuzima mu mishamirano ifatiye kuri ayo matora nkuko izo ndorerezi zibivuga.