Rafael Callejas, wahoze ari umukuru w'igihugu cya Honduras muri Amerika y'Epfo, yapfiriye muri gereza muri Leta zunze ubumwe z'Amerika
Rafael Callejas yitabye Imana afite imyaka 76 y'amavuko. Nk'uko ibigo ntaramakuru AP cyo muri Leta zunze ubumwe z'Amerika na AFP cyo mu Bufaransa bibivuga, azize indwara y'umutima. Yapfiriye muri gereza mu mujyi wa Atlanta, muri leta ya Georgia, mu majyepfo y'uburasirazuba bwa Leta zunze ubumwe z'Amerika.
Yategetse Honduras kuva mu 1990 kugera mu 1994. Nyuma yaho, guhera mu 2002 kugera mu kwa munani gushize, yabaye perezida w'ishyirahamwe ry'umpira w'amaguru ry'igihugu cye. Yabaye kandi muri komite y'ishyirahamwe mpuzamahanga ry'umupira w'amaguru FIFA ishinzwe kwamamaza mu itangazamakuru na televiziyo.
Mu kwezi kwa 12 mu 2015, ubucamanza bwa Leta zunze ubumwe z'Amerika bwareganye Rafael Callejas n'abandi bategetsi ba FIFA 39 ibyaha bya ruswa mu cyaje kwitwa Fifagate. By'umwihariko, we yaregwaga ko yakiriye indonke y'amadolari miliyoni imwe n'ibihumbi 600 kugirango imikino mpuzamahanga yose ya Honduras izajye inyuzwa kuri televiziyo n'ikigo kimwe rukumbi cyitwa Media World cyo muri Florida muri Leta zunze ubumwe z'Amerika.
Hashize iminsi 12 akimara kuregwa, Rafael Callejas we ku giti cye yishyize mu maboko y'ubucamanza bwa Leta zunze ubumwe z'Amerika mu kwa 12, 2015. Yaburanye yemera ibyaha. Iburanisha ry'urubanza rwe ryarangiye mu 2016, ahita afungwa. Yitabya Imana yagombaga kwitaba urukiko ejo ku italiki ya 5 y'uku kwezi kwa kane kugirango umucamanza amumenyeshe imyaka y'igifungo cye.