Muri Somaliya, inteko ishinga amategeko, Umutwe w'Abadepite, yongereye manda ya Perezida Mohamed Abdullahi Farmajo imyaka ibiri. Indi yari yararangije mu kwezi kwa 12 gushize.
Abadepite 149 batoye 'Yego', umwe 'Oya', naho abandi batatu bifashe. Inama yatumijwe igitaraganya, itateganyijwe, ejo nijoro. Umutekano wari ukaze cyane ku ngoro y'inteko ishinga amategeko n'inkengero zayo.
Kongera manda ya Perezida Farmajo na guverinoma ye, ndetse na manda y'inteko ishinga amategeko nayo yarangiye mu kwa 12 gushize, ntibivugwaho rumwe. Abanyapolitiki bamurwanya, n'ebyiri zikomeye muri leta zifite ubwigenge bucagase zigize igihugu, ari zo Puntland na Jubaland, bavuga ko ibi byose binyuranyije n'itegeko nshinga. Bashatse ko amatora aba mu kwa 12 gushize birananirana.
Amahanga n'imiryango mpuzamahanga nabo babyinjiyemo: Umuryango w'Abibumbye, Umuryango w'ubumwe bw'Ubulayi, Umuryango w'ubumwe bw'Afrika, na Leta zunze ubumwe z'Amerika, baherutse gusohora itangazo bavuga ko "batazashyigikira umugambi wo kongera manda y'umukuru w'igihugu n'inteko ishinga amategeko.