OMS, Ishami ry'Umuryango w'Abibumbye rishinzwe ubuzima, iratangaza ko u Rwanda rumaze guha inkingo za Covid-19 zose za ngombwa abaturage barwo 10%. Rwujuje umugambi OMS yari yarateganyije kugeraho muri uku kwezi kwa cyenda.
Nk'uko Dr Salla Ndoungou Ba, uhagarariye OMS mu Rwanda, abivuga, "u Rwanda ni intangarugero mu karere, kuva ibikorwa byo gukingira abaturage bikimara gutangira mu kwezi kwa gatatu k'uyu mwaka.
Mu kwezi kwa gatanu gushize, umuyobozi mukuru wa OMS, Dr Tedros Adhanom Ghebreyesus, yatanze umugambi rusange wo gukingira abaturage 10% ba buri gihugu ku isi yose bitarenze uku kwezi kwa cyenda, 40% bitarenze ukwa 12 gutaha, na 70% hagati mu mwaka uza w'2022.
OMS ivuga ko ibihugu 14 byo muri Afrika ari byo byageze ku mugambi wa mbere w'10%. Bitatu byonyine gusa ku mugabane byageze ku mugambi wa kabiri wa 40%.
Kugeza ubu, u Rwanda rwabonye inkingo za Covid-19 zigera kuri miliyoni 3.4, zaturutse muri Covax, ikigo cy'Afrika gishinzwe gukumira indwara, no mu masezerano atandukanye n'ibindi bihugu. Rumaze gukoresha inkingo miliyoni 3.3, zahawe rero abantu 10% kuri miliyoni 13 barutuye. OMS yanzura ivuga ko izarufasha kugirango ruzabe rwararangije gukingira abaturage barwo 60% hagati mu mwaka utaha.