Ishami ry'Umuryango w'Abibumbye ryita ku buzima (OMS) rivuga ko abantu bagera kuri miliyari buri mwaka barwara ibicurane ndetse bigahitana abari hagati y'ibihumbi 290 na 659. Ibicurane na Covid 19 zose ni indwara zifata mu myaya y'ubuhumekero kandi zifite ibimenyetso bimwe.
None OMS ihangayikishijwe n'uko inzego z'ubuvuzi zishobora kuremererwa mu gihe abandura iyi ndwara baba benshi biyongera ku basanzwe banduye Covid 19.
Umuyobozi ukuriye ibiro bishinzwe kwirinda no kurwanya ibicurane mu ishami ry'Umuryango w'Abibumbye ryita ku buzima, Ann Moen yabwiye Ijwi ry'Amerika ko iki gihe kiri imbere bishobora gukomerera inzego z'ubuvuzi kwita ku badura ibicurane bisanzwe n'abandura Covid 19.
Bityo, irashishikariza abantu kwikingiza hakiri kare ngo bibafashe kwirinda kwandura iyi ndwara. Irasaba ko abakora mu nzego z'ubuvuzi n'abageze mu za bukuru bashobora kwandura ibicurane mu buryo bworoshye aribo bakwihutira kwikingiza hakiri kare.