Ingabo za Burkina Faso n'iza Nijeri baratangaza ko bishe "abaterabwoba" bagera ku ijana mu bikorwa bya gisilikare bafatanyije kuva ku italiki ya 25 y'ukwezi gushize kugera ejo kuwa kane hashize.
Iyi mirwano yabereye ku mipaka y'ibihugu byombi, habaye indiri y'abajihadisiti. Uretse "abaterabwoba" bishwe, abasilikare ba Burkina Faso na Nijeri bataye muri yombi abandi byibura 20.
Ku ruhande rw'ingabo za leta, itangazo rusange bashyize ahagaragara rivuga ko abasilikare bane ba Burkina Faso bapfuye, naho 13 b'ibihugu byombi barakomeretse.
Kuva ku italiki ya 21 kugera ku ya 27 z'ukwezi gushize, Burkina Faso nabwo yari yifatanyije n'abaturanyi bayo Côte d'Ivoire, Togo na Ghana mu bindi bikorwa bya gisilikare byo kurwanya abajihadisiti, byatumye abarenga 300 bafatwa.
Abaturage ba Burkina Faso by'umwihariko bamaze iminsi berekana ko batishimiye ko leta yabo itabarengera uko bikwiye. Byatumye Perezida Roch Marc Christian Kaboré asezerera minisitiri w'intebe Christophe Marie Joseph Dabiré, na guverinoma ye ejobundi kuwa gatatu w'iki cyumweru.
VOA Afrique/AFP