ONU iravuga ko ihindagurika ry'ibihe ari ryo ryateye imyuzure idasanzwe yabaye muri Sudani y'Epfo kuva muri 1962. Ishami rya ONU ryita ku mpunzi, HCR kuri uyu wa kabiri ryavuze ko abantu barenga ibihumbi 700 bahuye n’ingaruka z’imyuzure muri Sudani y’Epfo. ONU yegeka imvano y'iyo myuzure ku ihindagurika ry’ibihe mu bice bimwe by’iki gihugu cy’Afurika mu myaka hafi 60 ishize.
Arafat Jamal, uhagarariye HCR muri Sudani y’Epfo, yabwiye inama ya ONU i Geneve, yasuzumaga muri make uko ibintu byifashe, akoresheje uburyo bw'iya kure aho yavugiraga mu murwa mukuru Juba, ko iki gihugu kiri imbere mu bifite abantu bakomeje n’ingaruka z’ibintu batateje.
Jamal yavuze ko ibihumbi 700, bahuye n’izo ngaruka kugeza ubu kandi ko umubare ugenda wiyongera. Nta mubare yari afite w’abahitanywe n’imyuzure iheruka.
Imvura nyinshi yaguye mu byumweru bishize, yatwaye amazu kandi yatumye amazi yuzura mu mirima y’imyaka kandi ko amatungo yahungishirijwe ahantu hegutse nk’uko Jamal yabivuze.
HCR yavuze ko imyuzure ahanini yibasiye Leta enye n’uturere tumwe twagize ibibazo bikomeye kurenza ibyabaye kuva mu 1962, aho abantu babuze ubushobozi bwo guhangana n’imyuzure ku myaka itatu ikurikiranye.
Bamwe bagoswe n’amazi bituma basigara batunzwe n’ibyatsi n’imizi, mu gihe abandi bamaze iminsi bagenda mbere yo kugera ku butaka bwumutse nk’uko Jamal yakomeje abivuga. Yongeyeho ko amatungo yarohamye n’ibihingwa mu mirima nk’amasaka n’uburo bikangirika. Yagize ati: “Uko ibintu birushaho gutikira ni ko abantu bagenda barushaho gukenera infashanyo”.
HCR yavuze ko byitezwe ko imvura izakomeza mu gice gisigaye cy’umwaka kandi ko bizongera n’umubare w’abantu bazakenera imfashanyo. Hari n’impungenge ko uko abantu barushaho kujya ahari ubutaka bwegutse, bishobora guzatuma haba ubushyamirane hagati y’abaturage.
Intumwa ya ONU mu kwezi kwa gatatu yavuze ko, imyaka hafi icumi kuva Sudani y’epfo ibonye ubwigenge nyuma y’intambara, igihugu gishobora guhura n’ibibazo bituruka ku bushyamirane, ihindagurika ry’ibihe na COVID-19.
Abaturage hafi ya bose, muri Sudani y’epfo, babeshejweho n’infashanyo y’ibiribwa yo ku rwego mpuzamahanga kandi serivisi hafi ya zose nk’iz’ubuzima n’uburezi, zitanga na ONU n’imiryango itanga infashanyo.
(Reuters)